❗❗❗Reuters: Ресей "Дружба" құбырымен Қазақстан мұнайын Германияға экспорттауды тоқтатпақ

Ресей "Дружба" құбыры арқылы Қазақстаннан Германияға мұнай жеткізуді 1 мамырдан бастап тоқтатпақ. Бұл жөнінде өз дереккөздеріне сілтеме жасап Reuters агенттігі хабарлады.

Аты-жөнін жарияламауды сұраған дереккөздер агенттікке мұнай экспорттаудың өзгертілген кестесі Қазақстан мен Ресейге жіберілгенін айтқан.

Ресейдің де, Қазақстанның да құзырлы органдары бұл жаңалыққа жария жауап берген жоқ. Ал Кремльдің баспасөз хатшысы Дмитрий Песков Reuters-ке мұнай экспортын тоқтату жоспарынан хабары жоқ екенін айтқан.

Қазақстанда төрт АЭС салынуы мүмкін. Алғашқы станцияға Ресейден несие алынбақ

Қазақстанда кемі үш АЭС салынбақ, жоспарда төртінші станция да бар. Бұл туралы Атом энергиясы жөніндегі агенттіктің басшысы Алмасадам Сәтқалиев мәлімдеді.

"Қазақстанның электр энергетикасы желілерінің дамуы тұрғысынан энергиямен қамтамасыз етудің тұрақтылығы үшін кемінде үш, ал перспективада төрт атом станциясын салу қажет деп есептейміз" деді Сәтқалиев 21 сәуір күні Ақордада журналистер сұрағына жауап беріп.

Оның сөзінше, станция салуға жарайды деген төрт аумақ қарастырылып отыр. Олар – Балқаш маңы, Курчатов қаласы, Батыс Қазақстан және Қостанай облысы. Ары қарай...

Demoscope: халықтың 61% президентке сенеді, 56% билікті сынау қауіпті дейді

Demoscope қоғамдық пікірді зерттеу бюросы "Билік институттарына қоғамның сенімі" дейтін сауалнамасының нәтижесін жариялады.

Онда Қазақстан халқының 85,4 пайызы елге өзгеріс керек деп санайтыны айтылады. 2023 жылғы сауалнамада бұл көрсеткіш 89,9 пайыз болған.

Кейінгі 12 айда билік органдарына салыстырмалы түрде сенім бар екені анықталды дейді авторлар. Респонденттердің 61.3 пайызы Қазақстан президентіне сенетінін айтқан. 2023 жылғы желтоқсандағы сауалнамада бұл көрсеткіш 69,4 пайыз еді. Ары қарай...

Қоштасу рәсімінің видеосы

Азалы жиынға Қазақстан парламенті сенатының спикері Мәулен Әшімбаев, вице-премьер әрі мәдениет және ақпарат министрі Аида Балаева, Алматы әкімі Дархан Сатыбалды, ақын Ұлықбек Есдәулет, әл-Фараби атындағы Қазақ ұлттық университетінің ректоры Жансейіт Түймебаев, мәжіліс депутаты Жанарбек Әшімжанов қатысып отыр.

Алматыда ақын, қоғам қайраткері, Қазақстан халық жазушысы Мұхтар Шахановпен қоштасу рәсімі өтіп жатыр.

ФБР басшысы The Atlantic басылымын сотқа беріп, 250 млн доллар талап етті

АҚШ-тағы федералдық тергеу бюросының (ФБР) директоры Каш Патель Вашингтон федералдық округтік сотына The Atlantic басылымының үстінен арыз түсірді. Оған басылымның Каш Патель ішімдікке құмарлығы туралы мақаласы түрткі болған.

Мақала авторлары Пательді "созылмалы маскүнем, қызметтік міндетін атқаруға қауқарсыз, қоғамдық қауіпсіздікке қатер төндіруші, сыртқы ықпалға осал" деп сипаттап, оның АҚШ әділет министрлігінің этикалық ережесін бұзғанын атап өткен. Журналист ФБР-дағы аноним дереккөздеріне сілтеп, Патель бірнеше төтенше жағдайда байланысқа шықпағанын, сондай-ақ оны құлыптаулы бөлмеден шығару үшін "есікті бұзатын құрал" қолданылғанын жазған. Сонымен қатар, ішімдік ФБР басшысының қылмыстық істерді тергеу туралы ресми мәлімдемелеріне де әсер ететіні, оның кейде өзін орынсыз ұстайтыны, сол арқылы АҚШ ұлттық қауіпсіздігіне қауіп төндіретіні айтылады.

Патель басылымды жала жапты деп айыптап, соттан The Atlantic басылымынан 250 млн доллар өндіруді сұраған. ФБР директоры мақаладағы деректерді өтірік деп атап, келтірілген фактілерде дәлдік жоқ, ал мақаланың өзі теріс пиғылда жазылған дейді. Талап-арызда ол басылымның өзін бұрыннан жақтырмайтынын, ал мақаланың мақсаты қоғамды ақпараттандыру емес, оны қызметінен кетіруге ықпал ету болғанын айтады.

ІІМ: Қазақстанда тұрақты тұрғысы келетіндерден қазақ тілін В2 деңгейінде білу талап етіледі

"Бүгінгі таңда Қазақстан Республикасы Еңбек және халықты әлеуметтік қорғау министрлігі бірлескен бұйрық жобасына өзгеріс енгізіп, тілді білу деңгейін ортадан жоғары – В2 деңгейі шеңберінде кемінде 70% көлемінде белгілеуді ұсынды. Бұл бұйрық жобасы қабылданды", –

деді Ішкі істер министрінің орынбасары Айдар Сайтбеков Азаттыққа.

Қазақстан аумағында тұрақты тұруға ниетті шетелдіктер мен азаматтығы жоқ адамдардың мемлекеттік тілді білу деңгейін анықтау туралы ереже 2026 жылғы 1 ақпанда енгізілген. Пилоттық жобада көшіп келушілер үшін қазақ тілін қарапайым - A1 деңгейінде білу жеткілікті болған.

"Хочу жить": Орталық Азиядан шыққан 13 мыңға жуық адам Украинада Ресей үшін соғысып жүр

Украиналық "Хочу жить" жобасы Орталық Азия елдерінен шыққан 12 666 азаматтың Ресей қорғаныс министрлігімен келісімшартқа отырғанын анықтаған. Бұл дерек жобаның Telegram-дағы "Украина – Орталық Азия" дейтін каналында жарияланды.

Келісімшартқа отырғандардың ең көбі Өзбекстаннан шыққан. Олардың саны – 4853 адам. Одан бөлек, Тәжікстаннан 3407, Қазақстаннан 2389, Қырғызстаннан 1439 және Түркіменстаннан 578 адам бар.

Ресей сапында соғысуға бел буғандар саны кейінгі жылда күрт артқан. Былтыр көктемде және жазда жоба тізімінде Орталық Азия елдерінен 5740 адам, яғни қазіргі көрсеткіштен екі есе аз адам болған. Жоба авторлары деректерді нақтылау жалғасып жатқанын айтады. Әзірге Ресей әскеріне қосылған Орталық Азия азаматтарының нешеуі қаза тапқаны айтылмады.

Ресейдегі Туапсе порты дрон шабуылынан кейін өртке оранды

Ресейдің Краснодар өлкесіндегі Туапсе теңіз порты 20 сәуірге қараған түні дрон шабуылынан соң өртке оранды. Бұл туралы жергілікті билік өкілдері мен мониторинг жүргізетін Telegram-каналдар хабарлады.

"Бүгін түнде Туапсе тағы бір ауқымды дрон шабуылына ұшырады. Алдын ала ақпарат бойынша, салдарынан теңіз портында бір адам қаза тапқан. Тағы біреу жарақат алып, оған қажет медициналық жәрдемнің барлығы жасалып жатыр. Теңіз портында өрт шықты" деді Краснодар өлкесінің губернаторы Вениамин Кондратьев.

Туапсе мұнай өңдеу зауыты бұған дейін 16 сәуір күні шабуылға ұшыраған. Зауыт теңіз терминалымен бірге "Роснефть" құрылымына кіреді. Бұл компанияны Ресей президенті Владимир Путиннің жақын досы, әрі серіктесі Игорь Сечин басқарады. Украина Туапсе мұнай инфрақұрылымына 2025 жылғы наурыз, қараша және желтоқсан айларында соққы жасаған.

Тоқаев Мұхтар Шахановтың қайтыс болуына байланысты көңіл айтты

Қазақстан президенті Қасым-Жомарт Тоқаев ақын, қоғам қайраткері Мұхтар Шахановтың қайтыс болуына байланысты оның туыстарына көңіл айту жеделхатын жолдады. Бұл туралы Ақорда баспасөз қызметі хабарлады.

Еуропаның үш елінде балалар тағамынан егеуқұйрыққа қарсы қолданылатын у табылды

Австрия полициясы HiPP балалар тағамының құтысынан егеуқұйрыққа қарсы қолданылатын у табылғанын хабарлады. Сөйтіп қауіпсіздік мақсатында осы елдегі Spar супермаркет желісінің 1500-ден астам дүкенінен бұл тағам алынып тасталды.

Хабарламаға қарағанда, у картоп пен сәбіз қосылған балалар тағамының 190 грамдық құтысынан табылған. Тексеріске бір сатып алушының шағымы түрткі болған.

Чехия мен Словакия полицейлері тәркілеген сондай құтылардың бастапқы зертханалық талдауы тағам құрамынан улы затты анықтаған. Полиция бұдан өзге деректерді хабарламады.

HiPP компаниясы Reuters ақпарат агенттігіне өз өнімінен егеуқұйрыққа қарсы у табылғанын растады. Қауіпсіздік шарасы ретінде қос елдегі сауда орындарынан HiPP балалар тағамы толықтай алынған. Мұның алдында компания бұл жатты "сыртқы тараптың қылмыстық әрекетінен туған жағдай" деп атаған.

Полицияның мәлімдеуінше, қауіпті құтылардың айрықша белгілері бар: құтының қақпасы ашық не бүлінген болады және құты түбінде қызыл шеңбері бар ақ жапсырма бар және құтыдан қалыптан тыс иіс шығады.

АҚШ Иранның жүк кемесін басып алды

Жексенбі, 19 сәуір күні Вашингтон Ормуз бұғазындағы АҚШ блокадасын бұзды деген ирандық жүк кемесін басып алғанын мәлімдеді. Бұл туралы Reuters агенттігі хабарлады. Иран қарымта қайтаратынын айтқан. Осылайша тараптар арасындағы атысты тоқтату туралы бітімнің бұзылу қаупі төніп отыр.

Жексенбі күні АҚШ әскерилері Иран туы ілінген жүк кемесін атқылағанын хабарлады. Олардың айтуынша, кеме Иранның Бандар-Аббас портына бағыт алған.

"Кеме толықтай біздің бақылауымызда, қазір кеме бортында не барын анықтап жатырмыз" деп жазды АҚШ президенті Дональд Трамп әлеуметтік желіде.

Ал Иран әскери күштері бұл кеменің Қытайдан келе жатқанын мәлімдеді.

"Иран ислам республикасының қарулы күштері жуырда қарымта қайтарып, АҚШ әскері тарапынан болған қарулы пираттық әрекетке жауап соққы жасайтынын ескертеміз" деді Иран әскерінің баспасөз хатшысы мемлекеттік медиа таратқан ақпаратта.

Мұхтар Шахановтың өмір жолы: әдебиет, Желтоқсан ақиқаты, Арал қасіреті және тіл

Қазақстанның халық жазушысы, ақын әрі қоғам қайраткері Мұхтар Шаханов 19 сәуірде Алматыдағы ауруханада қайтыс болды.

1942 жылғы 2 шілдеде қазіргі Түркістан облысында дүниеге келген Мұхтар Шаханов еңбек жолын тракторшы болып бастап, кейін Шымкент педагогикалық институтының филология факультетін тәмамдаған.

Мұхтар Шаханов советтік Қазақстанда поэзия, проза және драматургия салаларында туындыларымен көпшілікке танылды, оның шығармалары 40-тан астам тілге аударылған.

Совет одағында билік басына Михаил Горбачев келуімен басталған өзгерістер кезінде Қазақстанда болған әйгілі Желтоқсан оқиғасынан кейін, сол кезде "Жалын" әдеби альманағын басқаратын ақын Мұхтар Шаханов көпшілікке жаңа қырынан танылды.

Толығырақ оқыңыз

Ақын Мұхтар Шаханов өмірден озды

Ақын, қоғам қайраткері Мұхтар Шаханов 84 жасқа қараған шағында дүниеден озды.

Мұхтар Шаханов 1942 жылы бүгінгі Түркістан облысында дүниеге келген. Совет дәуірінде «Оңтүстік Қазақстан», «Лениншіл жас» сияқты түрлі басылымдарда түрлі қызмет атқарған. Республикалық «Жалын» журналын басқарған.

1993-2003 жылдары Қазақстан Республикасының Қырғызстандағы елшісі болды. 2004 жылы парламент мәжілісінің депутаты болған.

Ақынның поэмалары мен балладалары 20-дан астам тілге аударылған. Арасында Шыңғыс Айтматовпен бірлесіп жазған «Құз басындағы аңшының зары» атты эссе кітабы мен «Сократты еске алу түні» драмасы да бар.

Ақын Қазақстандағы қоғамдық-саяси мәселелерге де пікірін білдіріп отырған. Әсіресе, қазақ тілінің ахуалына көп алаңдаушылық білдірген. 2011 жылы елде Мұхтар Шаханов бастаған бір топ адам биліктен қазақ тілінің мәртебесін жоғарлатуды, Конституциядан орыс тілінің ресми тіл статусын алып тастауды талап еткен. Бірақ Конституциядағы тілге қатысты баптар өзгеріссіз қалған.

⚡Рыбакина Porsche көлігін жеңіп алды

Қазақстан теннисшісі Елена Рыбакина (әлемнің екінші ракеткасы) Штутгардта өткен WTA-500 турнирінің жеңімпазы атанды. Ол финалда чехиялық Каролина Мухованы (әлемнің 12-ракеткасы) екі сетте жеңді - 7:5, 6:2. Рыбакина жеңімпазға берілетін Porsche көлігін иеледі әрі рейтингіне 500 ұпай қосты.

Қазақстан теннисшісі бұл жарыста екінші рет жеңіске жетіп, екінші рет көлік иеленді. Рыбакина бұл турнирді 2024 жылы да ұтқан.

Елена Рыбакина биыл қаңтарда Grand Slam жарыстары қатарына енетін беелді Австралия ашық чемпионатында жеңіске жеткен еді.

Қазір ол Беларусь теннисшісі Арина Соболенкомен әлемнің бірінші ракетасы атағына талас жүргізіп жатыр. Соболенко рейтингіде бірінші, Рыбакина екінші орында тұр.

Сурет: AFP

Арқалықта жануар құқығын қорғаушылар митинг өткізе алмады

Қостанай облысы Арқалық қаласында 18 сәуірде өтуі тиіс болған "Жануарларға жауапкершілікпен қарау туралы" заңға ұсынылған түзетулерге қарсы рұқсат етілген митинг өтпей қалды. Бұл жөнінде митингіні ұйымдастырушы Татьяна Шоқан хабарлады.

Жануар құқығын қорғаушының сөзінше, ол митингіге бару үшін үйінен шығып, таксиге отырмақ болған кезде белгісіз ер адам аулада оны бөгеп, "арандатуға" тырысқан.

Сурет: Мұрағаттан алынған сурет.