Yosh dasturchilar korrupsiyaga qarshi innotvatsion yechimlar taklif etmoqda

Avval xabar berganimizdek, ayni kunlarda “Sarbon” universitetida “Aksilkorrupsiya xakatoni – 2026” bo‘lib o‘tmoqda.

Ushbu muhim tashabbus doirasida respublikaning barcha hududlaridan 18–35 yosh oralig‘idagi iqtidorli IT mutaxassislar ishtirok etmoqda.

Dastlabki bosqichdayoq xakatonga qiziqish yuqori bo‘ldi — 600 nafardan ortiq yosh dasturchi ro‘yxatdan o‘tdi.

Uch kundan buyon ishtirokchilar 2–3 kishilik jamoalar tarkibida ochiq ma’lumotlardan samarali foydalanib, korrupsiyaga qarshi innovatsion va amaliy yechimlar ishlab chiqish ustida ishlamoqda.

Har bir jamoa o‘zining kreativ g‘oyasi va ilg'or tashabbuslari bilan ajralib turishga intilmoqda.

Bugun xakatonning eng muhim — final bosqichi bo‘lib o‘tadi. Unda eng yaxshi loyihalar saralanib, g‘oliblar nomi e’lon qilinadi.

Tadbir jarayonlarini rasmiy sahifalarimiz orqali kuzatib boring.

Ma'lumot uchun: Bu yilgi xakaton Korrupsiyaga qarshi kurashish agentligi tomonidan "Sarbon" universiteti, Raqamli texnologiyalar vazirligi, "Oʻzmetkombinat" AJ, IT Park hamkorligida tashkil qilinmoqda.

———
Korrupsiyaga duch kelsangiz Agentlikning “Call-markazi” – 1253 orqali murojaat qilishingizni so‘raymiz.

Komplayens-nazorat bo‘linmalari faoliyati tanqidiy muhokama qilindi

Davlatimiz rahbarining Oliy Majlisga yo‘llagan Murojaatnomasida 2026-yilni korrupsiyaga qarshi kurashishda “favqulodda holat” deb e’lon qilingani asosida komplayens nazoratini takomillashtirish bo‘yicha ishlar holati va ustuvor vazifalarga bag‘ishlangan tanqidiy yig‘ilish o‘tkazildi.

Unda Prezident Administratsiyasining Komplayens xizmati, Korrupsiyaga qarshi kurashish agentligi mas’ul xodimlari, shuningdek, davlat organlari va tashkilotlarining korrupsiyaga qarshi ichki nazorat (komplayens) tuzilmalari rahbarlari ishtirok etdi.

Yig‘ilishda sohaga oid davlat siyosatini sifat jihatidan yangi bosqichga ko‘tarishning 2030 yilgacha bo‘lgan ustuvor yo‘nalishlaridan biri sifatida korrupsiya oqibatlari bilan kurashishdan ko‘ra korrupsiyaviy omillarni barvaqt aniqlash va preventiv mexanizmlarni joriy etish orqali tizimli korrupsiyaviy holatlarni oldini olish ekanligi qayd etildi.

Qisqa vaqt ichida amalga oshirilgan ishlar natijasida yangi komplayens nazorati tizimi orqali jinoyat ishlari doirasida 4,2 trln so‘m, yashirin iqtisodiyot ulushini jilovlash hisobiga 8,5 trln so‘m miqdoridagi mablag‘larning undirilishi muvofiqlashtirilgani hamda 1,3 trln so‘mlik ortiq budjet mablag‘lari xarajatlari oldi olinganligi qayd etildi.

Shu bilan birga, ichki nazorat tuzilmalari mustaqilligi va samarali faoliyati uchun barcha zarur sharoitlar yaratilayotgan bo‘lishiga qaramay, ayrim bo‘linmalar faoliyatida hanuzgacha ijobiy o‘zgarishlar kuzatilmayotgani keskin tanqid qilindi va yo‘l qo‘yilayotgan kamchiliklar ochiq muhokama qilindi.

Birinchidan, komplayens bo‘linmalarining asosiy vazifasi korrupsiyaviy holatlarning oldini olishga qaratilgan tizimli preventiv choralarni ishlab chiqish va amaliyotga tatbiq etish bo‘lsada, aksariyat davlat organlari va tashkilotlari tomonidan faoliyati talab darajasida ish tashkil etilmagan.

Shuningdek, ayrim davlat organlarida komplayens bo‘linmalari qonunchilikda belgilangan minimal mezonlar asosida tashkil etilmagan.

O‘rganilgan 50 ta tashkilotning 23 tasida bu talablar bajarilmagan.

Ikkinchidan, ayrim vazirlik va hokimliklarda nazorat tadbirlari umuman o‘tkazilmagan. Ba’zi tashkilotlarda o‘tkazilgan tekshiruvlarda esa moliyaviy qonunbuzilishlar umuman aniqlanmagan, bu esa nazorat samaradorligiga shubha uyg‘otadi.

Uchinchidan, manfaatlar to‘qnashuvining oldini olish bo‘yicha ishlar yetarlicha samara bermayapti.

Xususan, joriy yilning o‘zida manfaatlar to‘qnashuvi yo‘l qo‘yganlik bo‘yicha 105 ta ma’muriy huquqbuzarliklar sodir etilgan.

To‘rtinchidan, ayrim davlat organlari tomonidan ijtimoiy ahamiyatga molik ma’lumotlar rasmiy veb-saytlarda o‘z vaqtida va to‘liq joylashtirilmayapti.

Beshinchidan, komplayens tizimida kadr va tashkiliy muammolar saqlanib qolmoqda, ayrim lavozimlar uzoq vaqt vakant holatda qolmoqda.

Oltinchidan, davlat xaridlari sohasida korrupsiya xavfining yuqoriligi saqlanib qolmoqda.

So‘nggi yillarda 800 nafardan ortiq shaxs ushbu yo‘nalishda jinoiy javobgarlikka tortilgan.

Yig‘ilishda Prezident Administratsiyasining Komplayens xizmati tomonidan vazirlik va idoralar rahbarlarining shaxsiy mas’uliyatini oshirish va komplayens tizimini natijador mexanizmga aylantirish bo‘yicha qat’iy vazifalar belgilab berildi.

Xususan, bundan buyon komplayens bo‘linmalarining asosiy vazifasi korrupsiyaviy holatlarning oldini olish ekanligi qayd etilib, ushbu bo‘linmalar faoliyati natijadorligi korrupsiyaviy omillarni erta aniqlash va bartaraf etish bo‘yicha preventiv choralarni samarali amalga oshirishga qarab baholanishi belgilandi.

Shuningdek, mas’uliyatsizlikka yo‘l qo‘ygan mas’ullarga nisbatan keskin choralar ko‘rilishi qayd etildi.

Yig‘ilish doirasida komplayens-nazorat bo‘linmalari rahbarlarining kun tartibidagi masalalar yuzasidan hisobotlari tinglandi.
———
Korrupsiyaga duch kelsangiz Agentlikning “Call-markazi” – 1253 orqali murojaat qilishingizni so‘raymiz.

Facebook*|Telegram |YouTube|Instagram*|Twitter|Veb-sayt

O‘zbekiston va АQSh o‘rtasida korrupsiyaga qarshi kurashish sohasidagi hamkorlik masalalari muhokama qilindi

Korrupsiyaga qarshi kurashish agentligi direktori Аkmal Burxanov hamda АQSh Davlat departamentining Giyohvand moddalarni nazorat qilish va huquqni muhofaza qilish ishlari byurosi (INL) Yevropa va Osiyo boshqarmasi direktori Mark Tervakoski o‘rtasida uchrashuv bo‘lib o‘tdi.

Uchrashuv avvalida Prezident Sh. Mirziyoev rahbarligida korrupsiyaga qarshi kurashish sohasida amalga oshirilayotgan islohotlar, erishilayotgan natijalar va Agentlik oldidagi ustuvor vazifalar xususida batafsil ma’lumot berildi.

Muzokaralar davomida ikki davlat o‘rtasida hamkorlikni yanada rivojlantirish istiqbollari ko‘rib chiqildi.

Xususan, korrupsiya haqida xabar bergan shaxslarni himoya qilish, Iqtisodiy hamkorlik va taraqqiyot tashkilotining 5-raund monitoringi doirasidagi tavsiyalarini amalga oshirish, korrupsiyaviy xavf-xatarlarni baholash metodologiyasini ishlab chiqish kabi qator yo‘nalishlarda amaliy hamkorlikni kuchaytirishga alohida urg‘u berildi.

Shu bilan birga, АQSh tomoni raqamli texnologiyalar va tog‘-kon sanoati sohalariga investitsiya kiritish va biznes yuritishdagi korrupsiyaviy xavf-xatarlarni tahlil qilish bo‘yicha qo‘shma loyihalarni amalga oshirishga tayyor ekanligini bildirdi.

Uchrashuv yakunida ilgari surilgan takliflar va yangi yo‘nalishlar doirasida o‘zaro manfaatli hamkorlikni yanada rivojlantirishga kelishib olindi.
———
Korrupsiyaga duch kelsangiz Agentlikning “Call-markazi” – 1253 orqali murojaat qilishingizni so‘raymiz.

Facebook*|Telegram |YouTube|Instagram*|Twitter|Veb-sayt

Jarqo‘rg‘on tumanini “Korrupsiyadan xoli hudud”ga aylantirish ishlari o‘rganildi

Bugun Korrupsiyaga qarshi kurashish agentligi direktori Akmal Burxanov Surxondaryo viloyatining Jarqo‘rg‘on tumanida mazkur yo‘nalishda tasdiqlangan chora-tadbirlar dasturi ijrosi bilan tanishdi.

O‘rganishlar davomida asosiy e’tibor quyidagilarga qaratildi:

- Ta’limda halollik: Tumandagi maktab va bog‘chalarda GRACE ta’lim dasturining joriy etilishi hamda “Halollik darslari” jarayoni ko‘zdan kechirildi;

- Tibbiyotdagi shaffoflik: Tuman Tibbiyot birlashmasida xizmat ko‘rsatish sifati va yaratilgan qulayliklar tahlil qilindi. Sohadagi korrupsiyaviy xavflarni bartaraf etish bo‘yicha mas’ullar bilan fikr almashildi;

- Raqamlashtirish va ochiqlik: Barcha sohalarda byurokratiyani qisqartirish, jarayonlarni raqamlashtirish va ochiqlikni ta’minlashning yangi mexanizmlarini joriy etish masalalari ko’rib chiqildi.

O‘rganish yakunlari bo'yicha Korrupsiyaga qarshi kurashish hududiy kengashi a’zolari ishtirokida viloyat tashkilotlarida korrupsiyaga qarshi kurashish faoliyati tanqidiy muhokama qilindi.

Muhokama davomida masʼul rahbarlarning amalga oshirilgan ishlar va erishilgan natijalar bo‘yicha hisobotlari tinglandi.

Yig‘ilish yakunida aniqlangan kamchiliklarni bartaraf etish, har bir band ijrosi bo‘yicha shaxsiy javobgarlikni va nazoratni kuchaytirish yuzasidan tegishli topshiriqlar berildi.
———
Korrupsiyaga duch kelsangiz Agentlikning “Call-markazi” – 1253 orqali murojaat qilishingizni so‘raymiz.

Facebook*|Telegram |YouTube|Instagram*|Twitter|Veb-sayt

Oʻzbekiston NNTlari Latviyada korrupsiyaga qarshi kurashish boʻyicha “Yozgi maktab”da ishtirok etmoqda

Riga shahrida o‘zbekistonlik NNT vakillari uchun korrupsiyaga qarshi kurashish yo‘nalishida tashkil etilgan ilk “Yozgi maktab” taʼlim dasturi o‘z ishini boshladi.

Mazkur dastur Korrupsiyaga qarshi kurashish agentligi tomonidan Yevropa Ittifoqi, Germaniya xalqaro hamkorlik jamiyati hamda Latviya Markaziy moliya va shartnomalar agentligi bilan hamkorlikda amalga oshirilayotgan “Oʻzbekistonda davlat boshqaruvini takomillashtirish – inklyuziv korrupsiyaning oldini olish” loyihasi doirasida tashkil etilmoqda.

Taʼkidlash joizki, ushbu tashabbus Agentlik tomonidan hamkor xalqaro tashkilotlar ko‘magida fuqarolik jamiyati institutlarini korrupsiyaga qarshi kurashish jarayonlariga faol jalb etish maqsadida oʻtkazib kelinayotgan oʻquv seminarlari va treninglarning mantiqiy davomi hisoblanadi.

Dasturda korrupsiyaga qarshi kurashish yoʻnalishida alohida faollik va tashabbuskorlik koʻrsatib kelayotgan fuqarolik jamiyati institutlarining 17 nafar vakillari ishtirok etmoqda.

Ishtirokchilar Latviyaning korrupsiyaga qarshi kurashish va uning oldini olish borasidagi ilgʻor tajribasi bilan yaqindan tanishmoqda.

Xususan, bugun ishtirokchilar Korrupsiyaga qarshi kurashish va oldini olish byurosi, Markaziy moliya va shartnomalar agentligi hamda Latviya Davlat kanselyariyasi kabi davlat idoralari faoliyati bilan tanishishdi.

Shuningdek, samarali boshqaruv va ijtimoiy sheriklik yoʻnalishlarida xalqaro ekspertlar bilan tajriba almashish imkоniyatiga ega boʻlinmoqda.

Mazkur “Yozgi maktab” dasturi fuqarolik jamiyati institutlari salohiyatini yanada mustahkamlash, ularning korrupsiyaga qarshi kurashishdagi ishtirokini kengaytirish hamda xalqaro hamkorlikni chuqurlashtirishga xizmat qiladi.

Tafsilotlar rasmiy sahifalarimiz orqali yoritib boriladi.
———
Korrupsiyaga duch kelsangiz Agentlikning “Call-markazi” – 1253 orqali murojaat qilishingizni so‘raymiz.

Facebook*|Telegram |YouTube|Instagram*|Twitter|Veb-sayt

Korrupsiyaviy xavf-xatarlarni baholashda ishtirok eting!

Prezident qaroriga muvofiq, davlat tashkilotlari faoliyatida korrupsiyaviy xavf-xatarlarni majburiy aniqlash va baholashdan o‘tkazish belgilangan.

Agentlik tomonidan korrupsiyaviy xavf-xatarlarni aniqlash va baholash uslubiyoti tasdiqlanib, maxsus elektron platformada baholashni amalga oshirish uchun yangi modul yaratildi.

Joriy yil davlat tashkilotlari faoliyatidagi 135 ta tashkilotning 10 mingdan ortiq funksiyada korrupsiyaviy xavflar “yuqori”, “o‘rta” va “past” darajalarda baholandi va Korrupsiyaga moyil bo‘lgan munosabatlar elektron reyestri loyihasi shakllantirildi.

Maʼlumot o‘rnida: Agentlik va jamoatchilik takliflari asosida har bir davlat tashkilotining Korrupsiyaga qarshi kurashish bo‘yicha dasturi shakllantirilib, birinchi rahbari tomonidan tasdiqlanadi. Dasturdan o‘rin olgan choralar yil yakuniga qadar amalga oshiriladi.

Mulohazalaringizni ushbu havola orqali 5-may sanasiga qadar yuborishingiz mumkin.

Korrupsiyaviy xavflar qanchalik to‘g‘ri va xolis baholanganligi haqida sizning ham fikringiz biz uchun muhim!
———
Korrupsiyaga duch kelsangiz Agentlikning “Call-markazi” – 1253 orqali murojaat qilishingizni so‘raymiz.

Facebook*|Telegram |YouTube|Instagram*|Twitter|Veb-sayt

Huquqni muhofaza qilish akademiyasi xalqaro aksilkorrupsiya standartiga muvofiqlik sertifikatini qo‘lga kiritdi

Huquqni muhofaza qilish akademiyasi mamlakatimizda korrupsiyaga qarshi kurashish sohasida yetakchi ilmiy-taʼlim muassasasi sifatida qisqa vaqt ichida o‘z tizimida milliy va xalqaro standartlarga muvofiq, korrupsiya tahdidlariga barqaror tura oladigan tizimni joriy etdi.

Jumladan, Korrupsiyaga qarshi kurashish agentligi bilan hamkorlikda Akademiyada korrupsiyaga qarshi kurashishning kompleks tizimi shakllantirilib, 10 dan ortiq ichki idoraviy hujjatlar qabul qilindi.

Akademiya va Agentlik o‘rtasidagi amaldagi memorandum doirasida korrupsiyaga qarshi kurashish sohasida o‘zaro hamkorlikni yanada rivojlantirish, xususan, “Korrupsiyaga qarshi kurashish virtual akademiyasi” elektron platformasi faoliyatini takomillashtirish bo‘yicha tizimli ishlar amalga oshirilmoqda.

Shu kabi tizimli chora-tadbirlar samarasi o‘laroq, Akademiyaning korrupsiyaga qarshi kurashish menejment tizimi ISO 37001:2025 xalqaro aksilkorrupsiya standartiga muvofiq deb topildi.

Eʼtiborlisi, Akademiya MDH davlatlari ichida ushbu xalqaro standart bo‘yicha muvofiqlik sertifikatini olgan tashkilotlar orasida xalqaro IAF tashkilotining ro‘yxatiga kiritilgan birinchi tashkilot bo‘ldi.

Ma’lumot uchun: Akademiyaning korrupsiyaga qarshi kurashish menejment tizimi Korrupsiyaga qarshi kurashish agentligi, Yevropa Ittifoqi va Germaniya Federal iqtisodiy hamkorlik va taraqqiyot vazirligi (BMZ) moliyaviy ko‘magida Germaniya xalqaro hamkorlik jamiyati (GIZ), Sloveniyaning “Mintaqaviy muloqot” xalqaro tashkiloti hamda Latviyaning Moliya va shartnoma markaziy agentligi (CFCA) hamkorligida “O‘zbekistonda davlat boshqaruvini takomillashtirish: korrupsiyaning oldini olishda inklyuziv yondashuv” qo‘shma loyihasi doirasida amalga oshirildi.

———
Korrupsiyaga duch kelsangiz Agentlikning “Call-markazi” – 1253 orqali murojaat qilishingizni so‘raymiz.

Facebook*|Telegram |YouTube|Instagram*|Twitter|Veb-sayt