Астанада 60-тан астам адамды алдаған әйел сотталды. Ол таныстары арқылы ипотека рәсімдеп, пәтер алып беруге және декреттік төлемді көбейтуге көмектесемін деп уәде беріп, адамдардан ақша, несие және кепілге қойылған мүліктер арқылы қаражат алған.

Прокуратура мәліметінше, келтірілген жалпы шығын 500 миллион теңгеден асқан. Сот әйелді 6 жыл 8 айға бас бостандығынан айырып, жәбірленушілердің материалдық шығынын өндіру туралы талаптарын қанағаттандырды. Үкім заңды күшіне енді.

Астанадағы қолайсыз ауа райының салдары.

Астаналықтар, жаңбыр сіздерді де әбігерге салды ма? Желіде тараған видеоларға қарағанда, бүгін елорданың біраз тұрғыны нөсердің астында қалған.

Еске салайық, 24 шілдеде Астанада құбылмалы бұлтты ауа райы сақталып, кей уақытта жаңбыр жауып, найзағай болады деп болжанып отыр.

Видео: әлеуметтік желілер

Алматыда әлеуметтік желіде көп әйел алуды насихаттаған бейнероликтер жариялаған ер адам анықталып, оған қатысты әкімшілік хаттама толтырылды.

Полицияның мәліметінше, мұндай контент Қазақстан заңнамасына қайшы келеді және отбасы институтының құндылықтарына нұқсан келтіреді.

Ер адамға 20 АЕК (86 500 теңге) көлемінде айыппұл салынуы мүмкін. Түсіндіру жұмыстарынан кейін ол барлық жазбасын әлеуметтік желідегі парақшасынан өшіріп тастаған.

Семейде полицияның екі көлігін өртеген зейнеткерге үкім шықты

65 жастағы семейлік зейнеткер учаскелік полицейлер әкімшілік хаттама толтырғанына ашуланып, кек алу үшін полицияның Changan CS55 Plus және Chevrolet Cobalt қызметтік көліктерін өртеп жіберген.

Сотта ол кінәсін толық мойындады. Сот оны бөтеннің мүлкін қасақана жою бабы бойынша кінәлі деп танып, 2 жыл 3 айға бас бостандығын шектеу жазасын тағайындады. Сондай-ақ, зейнеткер полицияға келтірілген 9,8 миллион теңге шығынды өтеуге міндеттелді.

Қазақстан жаңа жерсерік жасауға 10 миллиард теңге бөледі. KazSat-3R 029 жылы пайдалану мерзімі аяқталатын KazSat-3 жерсерігінің орнын басады.

Қаражат Үкіметтің резервінен бөлінеді.

Үкіметтің мәліметінше, жаңа жерсерік байланыс желілері мен телерадио хабарларын таратудың тұрақты жұмысын қамтамасыз етіп, халқы сирек қоныстанған және шалғай елді мекендерде интернетке қолжетімділікті кеңейтуге мүмкіндік береді. Сонымен қатар бұл Қазақстанның технологиялық тәуелсіздігін күшейтіп, өзге елдерге тәуелділікті азайтуға ықпал етеді.

Чечил ірімшігіне шашалған ер адам клиникалық өлімнен аман қалды

Солтүстік Қазақстан облысында жедел жәрдем қызметкерлері чечил ірімшігіне шашалып, клиникалық өлім жағдайына түскен 50 жастағы ер адамды құтқарып қалды.

Оқиға Бескөл ауылында болған. Дәрігерлер келгенде ер адамның тамыр соғысы болмаған. Реанимациялық шаралар кезінде оның тыныс жолынан чечил ірімшігі алынып, жүрек соғысы қайта қалпына келтірілді.

Ауруханаға жеткізілгенде науқас өздігінен тыныс ала бастаған. Дәрігерлердің айтуынша, қазір оның өміріне қауіп жоқ.

Вьетнамнан халықаралық іздеуде жүрген шетел азаматы Қазақстанға экстрадицияланды.

Тергеу мәліметінше, ол 2022–2023 жылдары сыбайласымен бірге Алматыда заңсыз ойын бизнесін ұйымдастырып, 12 миллион теңгеден астам қылмыстық табыс тапқан.
Сыбайласы бұған дейін жауапқа тартылған, ал күдікті шетелге қашып кеткен. Ол биыл ақпанда Вьетнамда ұсталып, Қазақстанға жеткізілді.

Қазір ер адам тергеу изоляторына қамалды. Айып тағылған қылмыс үшін мүлкі тәркіленіп, 5 жылға дейін бас бостандығынан айыру жазасы көзделген.

Бақытжан Байжанов бостандыққа шықты.

Қуандық Бишімбаевтың туысы Бақытжан Байжанов рақымшылыққа ілініп, мерзімінен бұрын босатылды.

Ол Салтанат Нүкенованың өліміне қатысты қылмысты жасырды деген айыппен 2024 жылы 4 жылға сотталған болатын. Адвокатының айтуынша, Байжанов бүгін отбасына оралды.

Павлодар облысы Жоламан ауылындағы сүт фермасында болған төтенше жағдайда алты адам көз жұмып, бір жұмысшы ауруханаға түсті.

Алдын ала мәлімет бойынша, олар кәріз құдығын жөндеу кезінде газға уланған. Қаза тапқандардың арасында бір әке мен оның екі ұлы бар.

Тергеу жүріп жатыр. Ферма басшылығы әр отбасыға 2 миллион теңгеден өтемақы беріп, жерлеу шығындарын толық өз мойнына алатынын мәлімдеді.

Балқашта жаңа әкім

Президент әкімшілігі мен мәслихаттың келісімімен Балқаш қаласының әкімі болып Саян Мұратұлы тағайындалды.

Ол мемлекеттік қызметте 2015 жылдан бері еңбек етіп келеді. Еңбек жолын Балқаш қаласының тұрғын үй-коммуналдық шаруашылығы бөлімінде бас маман ретінде бастаған.

1 шілдеден бастап Қазақстанда абаттандыру қағидалары өзгерді. Енді жеке үй мен коммерциялық нысан иелері өз аумағынан бөлек, үйінен 5 метрге дейінгі іргелес аумақтың тазалығына да жауап береді.

Не өзгерді?
- 5 метрлік іргелес аумақ заңмен нақты бекітілді.
- Қоқыс, арамшөп, қар мен мұзды тазалау міндетті.
- Қоршау сыртында құрылыс материалдарын, отын, тыңайтқыш, тіркеме немесе көлікті ұзақ уақыт қалдыруға болмайды.
- Үйдің нөмірлік белгісі болуы, қасбет пен қоршау күтімді болуы тиіс.
- Құрылыс қоқысын тек арнайы орындарға шығару қажет.

Айыппұлдар:
- Абаттандыру қағидаларын бұзғаны үшін – 20 АЕК (86 500 теңге) бастап.
- Ортақ аумақты ластағаны үшін – 10 АЕК (43 250 теңге) немесе қоғамдық жұмыс.
- Қайталанса, жаза күшейеді.

Хаттаманы енді полициямен қатар әкімдік инспекторлары да толтыра алады.

Ең маңыздысы: 5 метрлік аумаққа қоқысты басқа біреу тастап кетсе де, оны тазалау міндеті меншік иесіне жүктеледі. Айыппұл төлегеннен кейін де қоқыс тазаланбаса, қайтадан жауапкершілікке тартылады.

🌊 Үкімет Жетісу облысындағы Алакөл жағалауын қорғауға 3 млрд теңге бөлді.

Қаражат ұзындығы 6 шақырымдық қорғаныс бөгетін салуға бағытталады: оның 2,5 шақырымы Көктұма ауылы маңында, 3,5 шақырымы Ақши ауылы жанында бой көтереді.

Жоба жағалауды нығайтып, көл жағасының одан әрі шайылуын болдырмауға мүмкіндік береді.

Президент үш жаңа елшіні тағайындады.

— Бұрынғы Премьер-министрдің орынбасары Ералы Тоғжанов Өзбекстандағы Қазақстанның елшісі болып тағайындалды. Ол бұл қызметте Бейбіт Атамқұловтың орнын басты. Тоғжанов әр жылдары Маңғыстау және Ақтөбе облыстарының әкімі болды.

— Әлібек Бақаев Ұлыбритания мен Солтүстік Ирландиядағы Қазақстанның елшісі болып тағайындалды. Бұған дейін ол Сыртқы істер министрінің орынбасары қызметін атқарған.

— Ал Сыртқы істер министрлігі аппаратының бұрынғы басшысы Амангелді Саинов енді Қазақстанның Румыниядағы елшісі болады. Бұған дейін бұл қызметті Ерлік Әли атқарған.

🇰🇿🇺🇸 Қазақстандық қыз АҚШ мэриясына жұмысқа орналасты

Қазақстандық Аружан Сахариянова АҚШ-тағы Furman University университетін үздік тәмамдап, Оңтүстік Каролинадағы Гринвилл қаласы әкімшілігінде орнықты даму жөніндегі тәлімгер (Sustainability Intern) қызметіне орналасты.
Аружан Қазақстаннан осы университетке түскен жалғыз студент болған. Төрт жыл ішінде алты тағылымдамадан өтіп, ғылыми және қоғамдық жобаларға қатысқан, екі рет алмасу бағдарламасымен білім алған және бірнеше академиялық марапатқа ие болған.

Енді ол Гринвилл қаласының экологиялық саясат пен орнықты даму бағытындағы жобаларымен айналысады.

Алматы маңында мопед жүргізушісі зейнеткер әйелді қағып, қашып кеткен

Кадрларда мопед жүргізушісінің артындағы жолаушымен бірге жоғары жылдамдықпен жаяу жүргінші әйелді қағып кеткені көрінеді. Соққыдан үш адам да құлаған. Әлеуметтік желіде жүргізушінің қашып кеткені айтылды.

Полиция күдіктінің анықталғанын хабарлады.

«ЖКО салдарынан жаяу жүргінші мен мопед жолаушысы жарақат алып, ауруханаға жеткізілді», – деді ведомство.

Жүргізуші жол ережесін бұзып, оқиға орнын тастап кеткені үшін жауапкершілікке тартылды.

Орталық сайлау комиссиясы "Әділет" партиясы Құрылтай сайлауына ұсынған 186 кандидатты ресми түрде тіркеді.

Партиялық тізімге заң, ғылым, бизнес, білім беру, медицина, цифрландыру, ауыл шаруашылығы, өнеркәсіп және мәдениет саласының өкілдері енген.

Тізімдегілердің орташа жасы – 45 жас.
Еске сала кетейік, "Әділет" партиясы 2026 жылы 1 маусымда тіркелген еді. Ал, Құрылтай сайлауы 23 тамызда өтеді.

Толық тізімді мына материалдан оқи аласыздар.

"Әділет" партиясы ұсынған материал

Махамбет Өтемісов атындағы Батыс Қазақстан мемлекеттік университетінің ректоры Нұрлан Серғалиев ұсталды.

Бұл ақпаратты бізге Ғылым және жоғары білім министрлігі растады.

Шымкентте Нұрай Серікбайдың өліміне қатысты сот процесі кейінге шегерілді.

Алғашқы отырыс сотталушының ЖРВИ-мен ауырып, сотқа келмеуіне байланысты небәрі 15 минутқа созылды. Оның денсаулығына байланысты сотқа қатыса алмайтыны жөнінде медициналық анықтама ұсынылған.

Отырыста сотталушының қорғаушылары процесті БАҚ-та жариялауға тыйым салуды және істі алқабилерсіз қарауды сұрады. Ал марқұмның туыстары соттың ашық өтіп, онлайн көрсетілуін және процесті сотталушысыз жалғастыруды талап етті.