Газ қазиб олиш март ойида 30%дан кўпга қулаган: Энергетика вазирлиги бирон изоҳ берадими?

Кечикиб очиқланган маълумотларга кўра, 2026 йил март ойида газ қазиб олиш мисли кўрилмаган даражада, янги тарихий минимумларгача пасайиб кетган (эҳтимолки, маълумотларнинг кечиккани хусусан шу воқелик билан ҳам боғлиқ бўлиши мумкин: аниқлик киритилишича, солиқ ва биржа маълумотлари билан солиштириш қўшимча вақт олган).

Ой давомида 2,7 млрд.куб газ қазиб олинган. Бу ўтган йилнинг шу даврига нисбатан 1,2 млрд.куб ёки 30,8%га кам дегани. Кунлик ҳисобда газ қазиб олиш 125,8 млн.кубдан 87,1 млн.кубга тушиб кетган (ҳатто шу йил февралдаям кунига 114 кубдан газ қазиб олинган).

Ҳали Ўзбекистоннинг эски ва янги тарихида бунақа юқори даражада газ қазиб олишнинг бирданига қулаши кузатилмаган эди. Бу қайсидир йирик кондаги муаммо билан боғлиқми? Ё давом этаётган тизимли инқирознинг янги тубими? Энергетика вазирлиги нима дейди? "Аномал юқори босимли", "жуда йирик" газ конлари очилди, дея юқорига берилган рапортлардан кейин аҳвол яхшиланиш ўрнига ойдан-ойга тобора оғирлашаётганига бирон-бир изоҳ борми?

Шунингдек, газ конденсати қазиб олиш ҳам кескин қисқарган ва 84,6 минг тоннагача тушган (-24,3 минг тонна), нефть қазиб олиш 54,2 минг тоннагача (-0,8 минг тонна), кўмир қазиб олиш 0,4 минг тоннагача (-0,1 минг тонна) пасайган.

Бензин импортига қарамлик кескин ортаётгани фонида бензин ишлаб чиқариш 108,8 минг тоннагача қисқарган (-7,2 минг тонна). Март ойида ишлаб чиқарилганидан кўра импорт қилинган бензин 1,4 карра кўп бўлган. Бунақаси ҳам тарихда биринчи марта, ҳали бирон ойда ишлаб чиқарилганидан кўп бензин импорт қилинмаган эди.