​Ўзбекнефтегаз 2025 йилда газ қазиб олишни яна сезиларли қисқартирган

Кечаги йиғилишда янграган рақамлардан келиб чиқилса, Ўзбекнефтегазда кунлик газ қазиб олиш 66 млн.кубга тушиб кетган. 2025 йил учун режалар муҳокама қилинган йиғилишда кунлик газ қазиб олиш ҳажми 76 млн.куб "етказилганлиги" таъкидланганди.

Энди 2026 йилда газ қазиб олиш ҳажмини кунлик 66 млн.кубдан 70 млн.кубгача кўпайтириш айтилган.

Аввалги ва кечаги презентацияларда айтилган рақамлардан келиб чиқилса, йиллик ҳисобда олинса, Ўзбекнефтегаз 2024 йилда 27,7 млрд.куб (режа 29,3 млрд.куб), 2025 йилда 24,1 млрд.куб (режа 26,5 млрд.куб) атрофида газ қазиб олгани маълум бўлади (Газета аниқ рақамларни сўраб компанияга сўров юборган). Энди 2026 йилда 25,4 млрд.куб газ қазиб олиш режа қилинмоқда. Йилдан-йилга Ўзбекнефтегазнинг газ қазиб олиш режалари пасайиб бормоқда, амалда қазиб олинган газ ҳажми эса янада юқори суръатда қисқармоқда.

Вазир Мирзамаҳмудов парламент олдидаги чиқишида 2026 йилда газ қазиб олиш ҳажмининг кўп йиллик пасайишини барқарорлаштириш режалаштирилаётганини айтганди.

Янгиланаётган Стратегия-2030 лойиҳасига кўра, Ўзбекистонда жами газ қазиб олиш келаси 2026 йилда 37,9 млрд.кубгача қулаши прогноз қилинган (2025 йилда жами 42,0 млрд.куб газ қазиб олинган, расмий статистика 21 январь куни очиқланади).