5,9 млрд.доллар. Ўзбекистон яна бир марта авиаёқилғи мустақиллигига эришадими?

Космосдан кўринадиган 4 млрд.долларгача шиширилган ҳайкал — GTL заводни қуриш лойиҳасини тасдиқлатиб олиш учун энергоагентлар шунақа афсона тўқишган: GTL завод қурилса, Ўзбекистон авиакеросин импортидан воз кечади ва авиаёқилғи арзон бўлади.

Лекин орадан шунча йил ўтиб, ваъда қилинган 307 минг тонна авиакеросин қани дейдиган, қанча ишлаб чиқараяпсан ўзи, тафтишчи йўқ. Нега Ўзбекистон экспорт қилиш ўрнига, 60%гача авиёқилғини импорт қилмоқда, яна импортиям, тақсимотиям олигархқўлли қилинган ва каррасига қимматлаштирилган авиаёқилғидан пуллар ўзбек халқининг чўнтагидан юлиниб, кимнинг чўнтагига оқмоқда, дейдиганам йўқ.

Шунинг учун, авиаёқилғи мустақиллигига эришиш учун навбатдаги марта 5,9 млрд.долларлик мегалойиҳа ясашни бошлашган экан, менда унинг истиқболига бирон ишонч йўқ. Муҳримбойнинг луқмалари ўринли, ўринлики нарёғи йўқ. Қўшимчасига, янги қўлинг ўргулсин замонимизда бирон мегалойиҳа ясашни бошлашса, айниқса тубга қулаётган энергетикада, унинг техник-иқтисодий асослари, иқтисодий самарадорлиги ҳақида гап очилмайди. Чунки кўп зараркунанда лойиҳалар иқтисодий самарадорлик ҳақида гап очилган жойдаёқ тўхташи керак. Лекин ҳозирча очиқланган хабарлардан яшил авиаёқилғи учун хом-ашё газ ёки нефтни қаердан олиниши, кафолатланган хом-ашё борми, молиялаштириш манбалари қандай, кимлар пул ва қарз беришга рози, қанақа хатарлар ва сценарийлар борлиги ҳақида ҳеч нарса эшитганимиз йўқ.

Дарвоқе, ўтган йили Хоразмда ташриф пайтида 10 миллиард.долларлик газ-кимё мажмуаси қурилиши ҳақида презентация қилишганди. 5,9 млрд долларга «яшил» авиаёқилғи ишлаб чиқариш заводи бу ўша афсонавий мажмуанинг бир қисмими ё алоҳидами?