GTL-5

Хоразм вилоятида қиймати 10 млрд.долларлик навбатдаги газ-кимё лойиҳаси амалга оширилади. Моҳияти ва мақсадига кўра уни шартли равишда GTL-5 аташ мумкин.

Хорижий инвестор номи айтилмаётганига қараганда бу шундай лойиҳаларнинг доимий буюртмачиси, пудратчиси ва бенефициари бўлган кипрлик ё сингапурлик инвестор бўлиши мумкин.

Лойиҳа қайси манбадан ва қанча миқдорда газ билан таъминланиши айтилмаган.

Солиштириш учун Бухородаги 2,7 млрд.долларлик МТО лойиҳаси учун 2 млрд.куб, Ўзбекнефтегаз илкидан олиниб "хорижий инвесторларга" тақдим этилган 1,8 млрд.долларлик Шўртангаз-2 лойиҳаси учун 2 млрд.куб, Бойсундаги 2,9 млрд.долларлик газ-кимё комплекси учун 5 млрд.куб газ керак. Саналган гигант лойиҳаларнинг биронтаси ҳали ишга тушмаган. Ишга туширилганидан буён тўлиқ қувватда ишламаган GTL тўлиқ қувватда ишлаши учун 3,6 млрд.куб газ талаб қилинади. Ўзи кенгайиб бораётган дефицитдаги газ баланси шароитида бу янги қувватлар учун газ қаердан топиб берилади?

Маблағ-чи? 10 млрд.долларлик маблағ қаердан топилади? Бу кипрлик ва сингапурлик инвесторлар гуруҳининг ялпи қарз юкини кимдир ҳисобладими, қарздорлик қандай сўндирилаётганини-чи? Ўзини ҳурмат қиладиган бирон инвестбанк уларга қарз берадими? Ё қарзлар яна Ўзбекистон номидан олинадими? Ёмон ўтмишимиздаги нолдан максимумгача соҳаларни эгаллаган газтрейдерининг қандай шиширилгани ва кейинги банкротлиги эсдан чиқмадими?