❗️Россиядаги ҳодиса оқибатлари бўйича Ҳукумат комиссияси тузилди

Президент Шавкат Мирзиёевнинг топшириғига мувофиқ, Россиянинг Татаристон Республикаси Нижнекамск шаҳрида содир бўлган ҳодиса оқибатларини бартараф этиш ва фуқароларимизга ёрдам кўрсатиш бўйича Ҳукумат комиссияси тузилди.

10 август куни тонгда Нижнекамск шаҳридаги қатор объектларга дронлар орқали ҳужум қилинган. Дастлабки маълумотларга кўра, ҳодиса оқибатида қурилиш корхонасида ишлаган 8 нафар Ўзбекистон фуқароси ҳалок бўлган, бир неча фуқаролар эса турли даражадаги тан жароҳатлари билан шифохонага жойлаштирилган.

Президент топшириғи асосан ташкил этилган Ҳукумат комиссиясига:

жабрланган фуқароларимиз ҳолидан хабар олиш ва уларга зарур ёрдам кўрсатиш;
ҳалок бўлган фуқароларни махсус авиарейс орқали Ўзбекистонга олиб келиш;
марҳумларни тегишли манзилларга етказиш;
уларнинг оила аъзоларига ҳар томонлама кўмаклашиш вазифалари юклатилди.

Шунингдек, Фавқулодда вазиятлар, Ташқи ишлар, Соғлиқни сақлаш вазирликлари, Миграция агентлиги ва бошқа мутасадди ташкилотлар вакилларидан иборат махсус ишчи гуруҳ Россияга юборилди.

Ўзбекистоннинг Қозон шаҳридаги Бош консулхонаси ва Миграция агентлиги вакиллари ҳодиса жойига етиб бориб, россиялик ҳамкасблари билан ҳамкорликда зарур чораларни кўрмоқда.

@pressuzb

Павел Дуров Тошкентдаги халқаро информатика олимпиадаси ғолибларини тақдирлайди

Telegram мессенжери асосчиси Павел Дуров ўзининг расмий каналида Тошкентда бошланган 2026 йилги Халқаро информатика олимпиадаси (IOI) иштирокчиларини қўллаб-қувватлашини маълум қилди.

Дуровнинг ёзишича, Telegram ва унинг ўзи олимпиаданинг 235 нафар ғолибига умумий қиймати камида 117 минг доллар бўлган эксклюзив рақамли коллекциялар — Algorithm Cups тақдим этади.

Дуров, шунингдек, олимпиаданинг айнан Ўзбекистонда ўтказилаётганини таъкидлаб, мамлакатни “алгоритм” сўзига ном берган буюк аллома Муҳаммад ал-Хоразмий ватани сифатида қайд этди.

“Энг яхши алгоритм ғалаба қозонсин!” — деб ёзди Павел Дуров.

@pressuzb

Ўзбекистонда коррупция энг кўп учрайдиган соҳалар маълум бўлди

2025 йилда коррупцияга оид жиноятлар бўйича 7 517 нафар шахс жиноий жавобгарликка тортилган. Коррупция оқибатида давлат манфаатларига 2,9 трлн сўмдан ортиқ зарар етказилган.

Коррупция билан боғлиқ жиноятларнинг энг кўпи мактабгача ва мактаб таълими, соғлиқни сақлаш, маҳаллий ҳокимликлар ҳамда тижорат банклари ҳиссасига тўғри келган.

Шунингдек, давлат харидлари соҳасида 12,6 трлн сўмлик қонунбузилишлар аниқланган.

@pressuzb

Илҳом Алиев Дональд Трамп билан телефон орқали мулоқот қилди

8 август куни Озарбайжон Президенти Илҳом Алиев ва АҚШ Президенти Дональд Трамп ўртасида телефон орқали мулоқот бўлиб ўтди.

Суҳбатда Вашингтон саммитига бир йил тўлгани муносабати билан Озарбайжон ва Арманистон ўртасидаги тинчлик жараёни муҳокама қилинди. Томонлар узоқ йиллик можарога барҳам берилганини таъкидлади.

Шунингдек, икки давлат ўртасидаги иқтисодий алоқалар, TRIPP транспорт лойиҳаси ва минтақада транспорт боғлиқлигини кучайтириш масалалари муҳокама қилинди.

Алиев Трампга Вашингтон саммитидаги роли ва Озарбайжонни G20 саммитига таклиф қилгани учун миннатдорлик билдирди. Томонлар Озарбайжон–АҚШ стратегик шериклигини янги босқичга олиб чиқишга келишиб олди.

Эслатиб ўтамиз, 7 август куни Президент Шавкат Мирзиёев ҳам Дональд Трамп билан телефон орқали мулоқот қилган эди.

@pressuzb

Президент Администрациясининг ҳуқуқий мақоми қонун билан мустаҳкамланмоқда

Давлат бошқаруви тизимида ҳар бир органнинг ваколати ва ҳуқуқий мақоми қонун билан аниқ белгиланиши ҳуқуқий давлатнинг асосий талабларидан биридир.

Шу нуқтаи назардан, Сенат томонидан “Ўзбекистон Республикаси Президенти Администрацияси тўғрисида”ги Конституциявий қонуннинг маъқулланиши давлат бошқарувини институционал жиҳатдан такомиллаштиришга қаратилган муҳим қадам ҳисобланади.

Бугунга қадар Президент Администрацияси фаолияти асосан Президент фармонлари ва бошқа норматив-ҳуқуқий ҳужжатлар билан тартибга солиб келинаётган эди. Эндиликда эса мазкур институтнинг ҳуқуқий мақоми Конституциявий қонун билан белгиланмоқда.

Муҳим жиҳат шундаки, қонун Президент Администрациясига янги ваколатлар бермайди. Аксинча, мавжуд ваколатларни қонуний асосга ўтказади, уларнинг чегараларини аниқ белгилайди ҳамда ҳуқуқий аниқликни таъминлайди.

Президент Администрацияси Президентнинг Конституцияда белгиланган ваколатларини амалга ошириш учун ташкилий, ҳуқуқий ва таҳлилий жиҳатдан хизмат қилади. Унинг мақомини қонун даражасида белгилаш давлат бошқаруви самарадорлигини оширишга хизмат қилади.

Қонун лойиҳаси ишлаб чиқилишида АҚШ, Финляндия, Чехия, Словакия, Руминия, Латвия ва Қозоғистон тажрибаси ўрганилди. Бу мазкур институт фаолияти кўплаб давлатларда ҳам алоҳида ҳуқуқий асосга эга эканини кўрсатади.

Шунингдек, қонун муҳокамаси Сенатнинг расмий интернет платформалари орқали тўғридан-тўғри эфирда намойиш этилди ва сенаторлар томонидан кенг муҳокама қилинди. Бу қонунчилик жараёнида очиқлик ва ошкоралик тамойилларига амал қилинаётганининг яна бир кўринишидир.

Мазкур қонуннинг қабул қилиниши фақат Президент Администрациясининг ҳуқуқий мақомини белгилаш билан чекланмайди. Бу давлат бошқарувини янада тизимли, ҳуқуқий ва замонавий асосда ташкил этишга қаратилган навбатдаги муҳим институционал ислоҳот ҳисобланади.

@pressuzb

Президент Шавкат Мирзиёев АҚШ Президенти Дональд Трамп билан телефон орқали мулоқот қилди

Олий даражада эришилган барча келишувларнинг изчил амалга оширилаётгани мамнуният билан қайд этилиб, стратегик шериклик муносабатларини янада ривожлантириш истиқболлари кўриб чиқилди.

Ўзаро ҳамкорликнинг деярли барча йўналишларини қамраб олган икки томонлама мулоқот ва алмашинувларнинг жадал суръатига юқори баҳо берилди.

Уч йиллик иқтисодий ҳамкорлик дастури изчил амалга оширилмоқда. Америка – Ўзбекистон ишбилармонлик ва инвестиция кенгашининг биринчи йиғилиши бўлиб ўтди. Ўзбекистон ҳудудлари ва Америка штатлари ўртасидаги ҳамкорлик кенгайиб бормоқда. АҚШ фуқаролари учун визасиз тартиб жорий этилгани ишбилармонлик алоқаларининг фаоллашувига хизмат қилмоқда.

Фуқаро авиацияси, автомобилсозлик, тоғ-кон саноати, инфратузилма, энергетика, металлургия, сунъий интеллект, рақамли технологиялар ва бошқа соҳаларда қўшма лойиҳалар амалга оширилмоқда.

Халқаро аҳамиятга молик масалалар муҳокама қилинар экан, глобал хавфсизликни таъминлаш, халқаро ва минтақавий можароларни тинч йўл билан ҳал этиш борасидаги саъй-ҳаракатларни давом эттириш муҳим экани таъкидланди.

Етакчилар бўлажак икки ва кўп томонлама тадбирлар режасини ҳам кўриб чиқдилар.

Суҳбат якунида Президент Шавкат Мирзиёев Президент Дональд Трампга ўзи учун қулай вақтда расмий ташриф билан мамлакатимизга келишни таклиф қилди.

@pressuzb

Наманган шаҳрининг собиқ ҳокими Анвар Отахўжаев 11 йилга қамалди

Жиноят ишлари бўйича Ўзбекистон туман судининг 7 августдаги ҳукми билан Наманган шаҳрининг собиқ ҳокими Анвар Отахўжаев Жиноят кодексининг 167, 168, 205, 206, 207, 209 ва 210-моддаларининг тегишли қисм ва бандларида назарда тутилган жиноятларни содир этганликда айбли деб топилди.

Унга жиноят кодексининг 59-моддаси 3-қисми тартибида узил-кесил 3 йил муддатга мансабдорлик ва моддий жавобгарлик юклатилган ишларда ишлаш ҳуқуқидан маҳрум қилган ҳолда 11 йил муддатга озодликдан маҳрум қилиш жазоси тайинланди.

Эслатиб ўтамиз, А.Отахўжаев 2025 йил сентябрь ойида 60 минг доллар пора билан ушланган эди.

@pressuzb

Бизнес-омбудсман Маъмурий жавобгарлик тўғрисидаги кодексдаги норманинг конституцияга мувофиқлигини текширишни сўраб, Конституциявий судга мурожаат қилди

Маълум қилинишича, президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девони томонидан якка тартибдаги тадбиркор Ш.Р.нинг мурожаати ўрганилган.

Унга кўра, 2025 йил 28 май куни тадбиркорга тегишли мебел ишлаб чиқариш корхонасида ёнғин содир бўлган. Воқеа юзасидан жиноят иши қўзғатиш рад этилиб, тадбиркор Маъмурий жавобгарлик тўғрисидаги кодекснинг 211-моддаси 3-қисми (ёнғин хавфсизлиги қоидаларини бузиш) бўйича жавобгарликка тортилган ҳамда 750 минг сўм миқдорда жарима қўлланилган.

Ушбу қарор кассация ҳамда Олий суднинг тафтиш инстанцияси томонидан ўзгаришсиз қолдирилган. Маъмурий жавобгарлик тўғрисидаги кодекснинг 324-39-моддасига кўра, тафтиш тартибидаги қарор узил-кесил ҳисобланиб, у бошқа ҳеч қандай суд инстанцияси томонидан қайта кўриб чиқилиши мумкин эмас.

“Шу билан бирга, худди шу воқеа бўйича алоҳида юритилган текширув натижасида тафтиш инстансияси қарори чиққанидан кейин (2026 йил июн ойида) суд-экспертиза хулосаси ва якуний тергов қарори қабул қилинган. Унга кўра, ёнғиннинг сабаби мебел корхонасининг электр тармоғидаги авария ҳолати бўлгани ва бу ҳолат тадбиркорнинг айби ёки қасддан қилинган ҳаракатлари билан боғлиқ эмаслиги объектив тарзда аниқланган.

Амалдаги норманинг узил-кесиллик қоидаси сабабли ушбу янги, тадбиркорнинг айбсизлигини тасдиқловчи далиллар ҳеч қандай суд инстанцияси томонидан кўриб чиқилмаган. Оқибатда 750 минг сўмлик маъмурий жарима тўғрисидаги қарор бугунги кунга қадар кучда қолмоқда”, дейилади хабарда.

Вакил девони ушбу ҳолатни конституциясининг айбсизлик презумпцияси (28-модда), инсон ҳуқуқ ва эркинликларини таъминлаш давлатнинг олий мақсади эканлиги (54-модда) ҳамда ҳар кимнинг ҳуқуқларини холис суд орқали ҳимоя қилиш ва бузилган ҳуқуқларни тиклаш ҳуқуқи (55-модда) қоидаларига мувофиқлиги нуқтаи назаридан баҳоланиши зарур, деб ҳисоблайди.

Шунга асосан, Бизнес-омбудсман Конституциявий судга расмий мурожаат йўллаган. Унда Маъмурий жавобгарлик тўғрисидаги кодекснинг 324-39-моддасини Конституциянинг 28, 54 ва 55-моддаларига мувофиқлигини текшириш сўралган.

@pressuzb

Марказий банк 2026 йилнинг иккинчи чораги якунлари асосида мурожаатлар билан ишлаш бўйича энг ёмон кўрсаткичга эга 10 та банк номини эълон қилди.

@pressuzb

President AI Award 2026 учун аризалар қабули 15 августгача узайтирилди

Сунъий интеллект йўналишида тайёр маҳсулотга эга стартап жамоалар President AI Award 2026 танловида иштирок этишлари мумкин.

Танловга ишлайдиган MVPга эга лойиҳалар қабул қилинади. Иштирокчилар давлат бошқаруви, саноат ва тадбиркорлик, тиббиёт, таълим, яшил иқтисодиёт ҳамда агротехнологиялар йўналишларида ўз ечимларини тақдим этиши мумкин.

Саралаш натижаларига кўра, 25 та стартап акселерация дастурига қабул қилинади. Кейин улар орасидан 15 та ғолиб танланиб, жами 1 млн доллар инвестиция ажратилади.

Аризалар 15 августгача awards.gov.uz платформаси орқали қабул қилинади.

@pressuzb

Маҳаллаларда янги иқтисодий модель: 1 759 та ҳудудда қандай ўзгаришлар кутилмоқда?

“Долзарб 40 кунлик” доирасида маҳаллалар иқтисодиётини ривожлантириш бўйича амалий ишлар бошланди. Агробанк томонидан Жиззах вилоятининг Бахмал туманида ўтказилган семинарда мазкур тизимнинг аниқ механизмлари очиқланди.

Асосий йўналишлар:
➖ Агробанкка бириктирилган 1 759 та маҳаллада ўрганишлар ўтказилиб, ҳар бирининг ички салоҳиятига мос «локомотив» микролойиҳалар шакллантирилмоқда.
➖ Маҳаллаларни кичик ишлаб чиқариш марказларига айлантириш учун маҳаллаларни ихтисослаштириш, “таянч маҳалла” ва “ихтисослашган маҳаллалар кластери” моделлари асосида ҳудудларни комплекс ривожлантириш жорий этилмоқда.
➖ “Agrostar” компаниялари билан ҳамкорликда “етиштириш – қайта ишлаш – сақлаш – қадоқлаш – сотиш” занжирини шакллантириш тўлиқ йўлга қўйилмоқда.
➖ Жараёнлар “Бир контур — бир маҳсулот” ва “устоз-шогирд” тамойиллари асосида олиб борилмоқда.

Мазкур ёндашув шаблон бўйича эмас, балки аниқ манзилли иш кўриш орқали аҳоли бандлигини таъминлаш ва даромадини барқарор оширишга хизмат қилмоқда. Бундан асосий мақсад — бу борадаги илғор тажрибаларни кенг оммалаштириш ҳамда уларни бошқа ҳудудларда ҳам самарали жорий этиш механизмларини такомиллаштиришдан иборат.

@pressuzb

Humans ишида навбатдаги қарор: учинчи шахслар жалб қилинди

Humans App дастурий таъминотига эгалик ҳуқуқи юзасидан давом этаётган суд ишида эндиликда яна икки компания ҳам иштирок этади. Миробод туманлараро суди Humans Lab ва Humans Trading компанияларини ишга учинчи шахс сифатида жалб қилиш ҳақида ажрим чиқарди.

Бу қарорга даъвогар томонининг илтимосномаси асос бўлган. Ундан аввал Адлия вазирлиги ҳузуридаги Патент идорасига Humans App дастурий маҳсулоти билан қайси юридик шахслар боғлиқлиги юзасидан мурожаат қилинган. Олинган жавобда Humans Lab ва Humans Trading компанияларининг мазкур дастурий маҳсулот билан алоқадорлиги қайд этилгани маълум қилинди.

Шундан сўнг суд мазкур компанияларни ҳам иш жараёнига жалб қилиш тўғрисида қарор қабул қилди. Бу уларнинг иш бўйича якуний қарордан манфаатдор томон сифатида ўз муносабатини билдириши, судга изоҳ ва далиллар тақдим этиши учун ҳуқуқий асос яратади.

Кейинги суд мажлисларида Humans Lab ва Humans Trading’нинг Humans App билан қандай ҳуқуқий муносабатда экани, дастурий маҳсулотдан қайси асосларда фойдаланаётгани ҳамда бу ҳолат даъвода кўтарилган эгалик ҳуқуқи масаласига қандай таъсир қилиши мумкинлиги муҳокама қилиниши кутилмоқда.

@pressuzb

Пойтахтдаги “Оқсарой” мажмуаси атрофи аҳоли учун очилмоқда

Ислом Каримов номидаги илмий-маърифий ёдгорлик мажмуаси (“Оқсарой”) атрофидаги темир панжаралар олиб ташланмоқда.

Эслатиб ўтамиз, аввалроқ Президент администрацияси раҳбари Саида Мирзиёева Тошкент шаҳридаги қатор муҳим объектларни кўздан кечириб, уларни халққа хизмат қиладиган қулай манзилга айлантириш кераклигини таъкидлаган эди.

@pressuzb

Тарихий кун: Samarkand-2028 сунъий йўлдоши орбитага муваффақиятли чиқарилди

Бугун, 5 август куни STAR.VISION компанияси томонидан Хитойнинг Шандун провинцияси қирғоқлари яқинидаги денгиз старт платформасидан Samarkand-2028 ва Lampung-1 гиперспектрал сунъий йўлдоши учирилди.

Мазкур лойиҳа Ўзбекистон тарихидаги энг йирик халқаро космик лойиҳалардан бири бўлиб, миллий космик дастур ривожида янги босқични бошлаб берди.

@pressuzb