​80 шиптир UNG Petro заправкаларида 8 150 сўмгача кўтарилган

Кеча, янги йилнинг биринчи кунида 80 шиптир лақабли бензин яширинча хусусийлаштирилган UNG Petro шохобчаларида 6 900 сўмдан 8 150 сўмгача қимматлаган.

Компания нархларнинг бирданига 18,1 фоизга оширилишини изоҳламаган.

Эҳтимолки, нархларнинг кескин ошиши 2025 йил 1 январдан эътиборан “Бухоро НҚИЗ” МЧЖ томонидан ишлаб чиқарилаётган барча турдаги нефт маҳсулотлари, шу жумладан, автобензин ҳам фақат биржа савдолари орқали сотилиши билан боғлиқ бўлиши мумкин.

Маълумот учун, бир йил аввал “хусусийлаштирилганига” қарамай UNG Petro бензинни биржадан ташқари, яъни тўғридан-тўғри ва имтиёзли нархларда сотиб олиш имконига эга бўлган.

Қизиғи, ҳали 2025 йил ҳисобидан биржа бирон кун ишлагани йўқ ва илк савдолар 3 январь куни ўтказилади. Бу дегани биржадан олинган бензин UNG Petro заправкаларида фақат келаси ҳафтадан сотилиши мумкин. Демак, ҳозирги 8 150 сўмдан сотилаётган бензин имтиёзли нархларда ва ўтган йили тўғридан-тўғри олинган арзон бензиннинг қолдиғи.

Шу пайтгача яширин имтиёзларга эга бўлиб келган ва “хусусийлаштирилганидан” кейин ҳам “шохи борлигича” қолган компанияга бу мумкинми?

Рақобат қўмитаси нима дейди? Солиқ қўмитаси нима дейди?

P.S. Роппа-роса бир йил аввал 80 шиптир UNG Petro шохобчаларида 6 050 сўмдан 6 800 сўмгача кўтарилган эди, бошқача айтганда 80 шиптир бир йил-у бир кун ичида нақ 34%га қимматлаган.