​UNG Petro 80 шиптирни ҳамма қатори биржадан олиши керак

Ёпиқ кабинетлардаги келишувлар билан "хусусийлаштирилганидан" кейин ҳам Ўзбекнефтегаз товар ва бренд белгиларидан фойдаланишда давом этаётган UNG Petro заправкаларида тушдан кейин 6 900 сўмлик 80 шиптир йўқ, вилоятлардаги шохобчаларида эса умуман йўқ.

UNG Petro "хусусийлаштирилганига" қарамай, ҳалигача бошқа тадбиркорлик субъектлари қатори биржадан бензин сотиб олмайди, тўғридан тўғри ишлаб чиқарувчидан етказиб берилади. Эҳтимолки, унга нисбатан солиқ, бож имтиёзлари бекор қилинмаган. Ташиш ва сақлаш билан боғлиқ имтиёзли тарифлар қўлланилаётган бўлиши мумкин (Антимонополия органи ўргансин дейишдан маъно йўққа ўхшайди, беихтиёр "Кичкина табиб" фильмидаги Машраб образи эсга тушади ).

Яна бир қизиқ ҳолат. Ўтган йили шу пайтда биржа савдоларига кунига камида 4 минг тонна 80 бензин қўйилган. Ҳозир 2 минг тоннадан зўрға ошаяпти (уям охирги кунларда).

Демак, нима қилиш керак? Орқа эшикдан бензин олиб, гўёки халқ учун дея 6 900 сўмдан бензин сотгандек алдамчи иллюзияни бекор қилиш керак. Ҳамма, ким бўлишидан қатъий назар, бензинни биржадан олиши лозим, ҳеч кимда ҳеч қанақа имтиёз бўлмаслиги керак, биржага қўйилаётган бензин ҳажми камида 2 баробар оширилиши керак.

Шундагина нархларни барқарорлаштириш ва рақобатли муҳитни шакллантириш мумкин бўлади.

Дарвоқе, келаси ҳафтадан ҳарорат ноль даражага яқинлашади. Бизнинг шонли энергетиклар учун бу минус 20 даражадек синов дегани. Тайёргарлигингизни кўриб қўяверинг.