​Биз билгандик, биз кутгандик: пропан ҳам "импорт игнасига" ўтқазилган

Тўхтамаётган энергокризис ортидан аввал бензин, кейин дизель, мана энди пропан бўйича ҳам импортга қарамлик яратилган.

Божхона қўмитаси ниҳоят пропан импорти маълумотларини алоҳида, нефть маҳсулотлари импорти маълумотларига қўшиб кўрсата бошлаган (аввалроқ нега кўрсатмагани алоҳида савол, шонли энергетикларни уялтиргилари келмаган эҳтимол).

Ўтган йилнинг шу даври билан солиштирганган пропан импорти 4 каррага ортган. Май ойида 12,6 млн.долларлик 21,9 минг тонна пропан импорт бўлган (биржада асосан импорт пропан сотилаётганини кўраётган бўлсангиз керак). Импорт пропаннинг тоннаси 377 доллардан 576 долларга, қарийб 200 долларга ёки 52,3%га қимматлаган. Эҳтимолки, ёнимиздаги қардош Туркманистондан арзон эмас, 3 минг километр наридаги шимол босқинчиларидан қиммат пропан импорт қилинмоқда.

Игнага ўтказилган бошқа ёқилғиларнинг ҳам нархи ошишдан тўхтамаган. Май ойида бензин литри 63,2 центдан (апрелда 57,6 цент), дизель эса 966 доллардан (апрелда 926 доллар) импорт бўлган.

Ёқилғи шохобчаларидаги ёрлиқларда сотилаётган маҳсулотларнинг ёнида ўзбек байроғи тиркалган маҳсулот қолмаганини ва фақат босқинчиларнинг маҳсулоти таклиф этилаётганини кўраётган чиқарсиз. Наҳотки, аввал бошдан уларнинг режаси шундай бўлган? Наҳотки, улар мақсадларига эришишди?