Сергели мошин бозор бузилмасакан, реконструкция қилинаркан

Тошкент шаҳар ҳокимияти Сергели машина бозорини (Истеъмолда бўлган транспорт воситалари ва эҳтиёт қисмлари Сергели бозори МЧЖ) бузиб ташлаш ҳақидаги миш-мишларни рад этган ва ҳудудда қурилиш, таъмирлаш ҳамда ободонлаштириш ишлари олиб борилаётганини маълум қилган.

Анҳорга маълум қилинишича, бу ишлар инфратузилмани янгилаш ва ташриф буюрувчилар ҳамда тадбиркорлар учун қулайроқ шароитлар яратишга қаратилган. Реконструкция лойиҳасининг қиймат ва мундарижаси билан боғлиқ тафсилотлари келтирилмаган.

Пул туғадиган Сергели машина бозори бузилиши ҳақида деярли ҳар йили миш-мишлар ўралайди. Мошинбозорнинг бузилиши, кўчирилиши ва ҳатто хусусийлаштирилиши ҳақидаги хабарларга одатда раддия бериб келинади.

Лекин мошинбозорнинг реконструкция қилиниши ҳақидаги изоҳ янгитдан янграмоқда.

Бозорнинг реконструкция қилиниши айтилиб, амалда қандай якунланиши мумкинлигини Қўйлиқ бозори мисолида ўзбекистонликлар кўришган.

Ўзи Тошкентда сотиш ва эгаллаш мумкин бўлган макон ўлароқ саноқли бозорлар ва яна ҳозирча мозорлар қолди. Бозорларнинг ер майдонларининг реконструкция ва турли "шерикчилик лойиҳалари" асосида эгалланиши (1, 2) авжига чиққан.