​"Аҳоли учун пропанга" субсидиялар 7,5 карра ошган

Тарифларнинг каррасига ошганига қарамай, нобарқарорлигича ва зараркунандалигича қолаётган энергетикани субсидиялаш тўхтамаган. Ёпиқлигича қолаётган ва кипрликми, гонконглик олигархнинг ўртамчилари сўраётган газ бассейни UzGasTrade орқали 7 трлн.сўм, бўйнига триллионлаб зарарлар илинаётган Ўзэнергосотиш орқали 500 млрд.сўм ўзлаштирилган бўлса, "аҳолига суюлтирилган газ етказиш" важи билан 359 млрд.сўм субсидия молиялаштирилган.

Ўзи йўқ суюлтирилган газ учун "аҳолига берилди" дея субсидия ўзлаштириш 2025 йилнинг ноу-хаусига айланган, ваҳоланки 2025 йил бюджетида бундай алоҳида харажат кўзда тутилмаган эди. Субсидиялашнинг 7,5 карра ошиши ҳам саволли, Бу Ўзбекнефтегаз ишлаб чиқарадиган пропан эмас, чўнтак компаниялар ёки импорт пропанни субсидиялаб, пул ўзлаштиришга ўхшайди.

"Аҳолига бераяпмиз" дейилаётган пропан охирги йилларда энг катта энергомахинациялардан бирига айланган, шунинг ўрнига газлашмаган ҳудудлар учун 50% чегирма бериш масаласи, мана учинчи йилдирки пайсалга солиб келинади.

Умуман олганда, бебилиска даромадлар ошиши ҳисобига бюджет ҳисобидан субсидиялаш 2024 йилдаги қисқартиришдан кейин 2025 йилда 29,4 трлн.сўмгача ошган ва 2023 йил рекордини янгилаган. Пул бўлса бўлди, ўзбек чиновники шериклари билан албатта субсидия ўйлаб топади.