​Ўзкимёсаноат "кипрлик олигархга" текинга совға қилган Самарқандкимё улушини 30 миллион доллар тўлаб сотиб олган

Ўтган йили илгари сурилган гумонлар тасдиғини топди. Ўзкимёсаноат 30 миллион доллар тўлаб Самарқандкимё МЧЖнинг 16,92% улушини сотиб олган. 6 йил аввал Ўзкимёсаноат Самарқандкимё'нинг 39,65% улушини ўша пайтда Кипрда рўйхатдан ўтган ва кейин пропискасини Гонконгга кўчирган «Ferkensco Management Limited»га ноль қийматда, текинга совға қилган эди.

Сиз бу қават-қават ва намойишкорона коррупцион абсурдни ўзингизга қандай тасаввур қиласиз, билмайман, лекин мутаносиб реакция қилиш учун Шуҳрат Ғаниевнинг машҳур сўзлари эсга келаяпти холос.

Ўзкимёсаноат ўзи Ўзбекистонга нима учун керак (юзмиллионлаб доллар қарзларини ФРРУ ҳисобидан ёпиб, текинга совға қилинган Деҳқонобод калий завод заводи билан ҳам шунақа схема қилинадими?). Шунақа шилта ва жирканч схемаларни ясаб, ўзбекистонликлар бойлигини олигархларга ўтказиб бериш, уларни боқиш ва бойитиш учунми? Ўзбекнефтегаз йиллар давомида шунақа коррупцион ишлар билан шуғулланиб келгани ва унинг оқибатлари етарли дарс бўлмадими?

Акмал Эшондедаевич, агар Самарқандкимё ва Деҳқонобод калий заводи билан боғлиқ схемалар коррупция бўлмаса, нима ўзи коррупция?