Бугун Жиззах вилояти божхона бошқармаси бошлиғи Ф.Артиков ҳамроҳлигида “Жиззах” ташқи иқтисодий фаолият божхона постида бўлиб, пост фаолияти билан яқиндан танишдик ҳамда божхона ходимлари билан мулоқот қилдик.

Учрашув давомида божхона тизимида амалга оширилаётган ислоҳотлар, ташқи иқтисодий фаолият иштирокчилари учун яратилган қулайликлар, аҳоли ва тадбиркорларга кўрсатилаётган хизматлар сифати ҳамда мурожаатлар билан ишлаш самарадорлиги масалалари муҳокама қилинди.

Мулоқот давомида аҳоли ва тадбиркорлар томонидан энг кўп билдирилаётган фикр-мулоҳазалар, таклиф ва мурожаатларнинг мазмунига алоҳида эътибор қаратилди. Уларнинг муаммоларига ўз вақтида ечим топиш, хизмат кўрсатиш жараёнларида очиқлик ва шаффофликни таъминлаш, тадбиркорлик субъектлари билан конструктив мулоқотни янада кучайтириш бўйича фикр алмашилди.

Таъкидланганидек, давлат органларининг жамоатчилик билан самарали мулоқоти, аҳоли ва тадбиркорларнинг фикрларини мунтазам ўрганиб бориш ҳамда улар асосида хизмат кўрсатиш сифатини ошириш бугунги куннинг муҳим вазифаларидан биридир.

Шу боисдан божхона органлари фаолияти ҳақида тезкор ва холис ахборот етказиш, фуқароларнинг мурожаатларига масъулият билан ёндашиш ҳар бир ходимнинг устувор вазифаси бўлиши лозимлиги қайд этилди.

Кун нафаси!

Жиззах. Медиа ҳафталик.

Жойидан репортаж

“Яллама”даги тирбандликларнинг олдини олиш юзасидан зарур чоралар кўрилмоқда.

Пишиқчилик мавсуми бошланиши ва қишлоқ хўжалиги маҳсулотлари экспорти ҳажмининг ортиши натижасида сўнгги кунларда Ўзбекистон–Қозоғистон чегарасидаги айрим ўтказиш пунктларида юк автотранспорт воситаларининг тирбандликлари кузатилмоқда.

Божхона қўмитаси Раиси А.Мавлонов мазкур масалани Қозоғистон божхона хизмати раҳбарияти билан атрофлича муҳокама қилди. Томонлар чегара орқали юк ташувларининг узлуксизлигини таъминлаш ва мавсумий юклама ортиши шароитида ҳамкорликни янада кучайтириш юзасидан ўзаро келишувга эришдилар

Топшириққа мувофиқ, вазиятни тезкор бартараф этиш мақсадида бугун Божхона қўмитаси Раисининг барча ўринбосарлари
Қозоғистон билан чегарадош “Яллама”, “С. Нажимов” ва “Сирдарё” чегара божхона постларида бўлиб, юк оқимини тезлаштириш ҳамда тирбандликларни қисқартиришга қаратилган амалий чора-тадбирларни ташкил этмоқдалар.

Жумладан, мазкур постларга божхона ва чегара хизматларининг қўшимча куч ҳамда воситалари жалб қилинди.

Қўшни давлатнинг тегишли божхона постлари раҳбарлари билан доимий тезкор мулоқот ўрнатилиб, ҳар икки томонда ҳам назорат ва расмийлаштирув ишларини кучайтирилган тартибда ташкил этиш чоралари кўрилмоқда.

Кўрилган чоралар натижасида 2026 йил 10 июнь куни соат 16:00 ҳолатига кўра тирбандлик ҳажми эрталабки кўрсаткичларга нисбатан ўртача 30–40 фоизга қисқарди.

Мутахассислар томонидан кун якунига қадар мавжуд навбатларни тўлиқ бартараф этиш бўйича ишлар давом эттирилмоқда.

Бугун Жиззах вилоятида бўлиб, республика бўйлаб ўтказилаётган “Медиа ҳафталик” доирасида вилоятдаги идора ва ташкилотларининг матбуот котиблари, маҳаллий журналистлар ва блогерлар билан амалий тажрибамизни ўртоқлашдик.

Тадбирда Божхона қўмитаси Матбуот хизмати фаолияти мисолида оммавий ахборот воситалари билан ҳамкорлик қилиш, ахборот тарқатишда тезкорлик ва ишончлиликни таъминлаш, ижтимоий тармоқларда самарали фаолият юритиш бўйича муҳим тавсиялар берилди.

Шунингдек, ахборот сиёсати соҳасидаги замонавий ёндашувлар, давлат органларининг очиқлиги ва шаффофлигини таъминлашда матбуот хизматларининг ўрни, жамоатчилик билан самарали мулоқотни йўлга қўйиш масалалари муҳокама қилинди.

Ўзаро мулоқотда давлат органлари фаолиятини кенг жамоатчиликка етказишда медиа майдоннинг имкониятларидан унумли фойдаланиш зарурлиги таъкидланди.

Учрашув давомида иштирокчилар ўзларини қизиқтирган саволларга атрофлича жавоб олдилар, соҳадаги мавжуд муаммолар ва уларнинг ечимлари юзасидан фикр алмашдилар. Самимий мулоқот руҳида кечган тадбир ахборот соҳаси ходимлари учун муҳим тажриба алмашиш майдонига айланди.

“Медиа ҳафталик” доирасида ўтказилаётган бундай учрашувлар давлат органлари ва оммавий ахборот воситалари ўртасидаги ҳамкорликни янада мустаҳкамлаш, аҳолини тезкор ва холис ахборот билан таъминлашга хизмат қилиши билан аҳамиятлидир.