Qoraqalpog‘iston: samaradorlik va tezkorlik ustuvor yo‘nalishga aylanmoqda

Qishloq xo‘jaligi vaziri Ibrohim Abdurahmonov Xorazm viloyatidagi ishchi tashrifini yakunlab, Qoraqalpog‘iston Respublikasiga keldi. Dastlabki manzil Beruniy tumani “Shabboz” OFY hududida joylashgan “Urazimbetov Nematjon” fermer xo‘jaligi bo‘ldi.

95 gektar maydonga ega xo‘jalikda hozirda sho‘r yuvish ishlari jadal olib borilmoqda. Vazir joyida turib, fermerga suv resurslaridan oqilona foydalanish va zamonaviy agrotexnologiyalarni joriy etish orqali yuqori natijaga erishish mumkinligini ta’kidladi. Shuningdek, shimoliy hududlarda sho‘r yuvishdan keyingi davr, yerning tabiiy qurishi va bu jarayonning kamida bir hafta davom etishi ekish muddatlariga ta’sir qilishi qayd etildi.

Shu bois yer maydonlarini tezkor ekishga tayyorlash, agrotexnik jarayonlarni optimallashtirish hamda mos navlarni ko‘k plyonka ostida ekish bo‘yicha topshiriqlar berildi. Bu esa hosilning erta pishib yetilishiga xizmat qiladi.

Muloqot davomida ekish jarayonlaridagi ortiqcha xarajatlar fermerlar uchun jiddiy yuk ekani ta’kidlandi. Paxtachilik kengashi va mutasaddi tashkilotlarga har bir tumanda ilmiy asoslangan yondashuvni keng joriy etish vazifasi yuklatildi. Ya’ni, chigit ekishdan hosil yig‘imigacha bo‘lgan barcha bosqichlar ilmiy asosda tushuntirilishi zarurligi qayd etildi.

�� Tashrif davomida vazir “Rahmatilla Chaman” fermer xo‘jaligida ham bo‘ldi. 22 gektar maydonga ega xo‘jalikning 7 gektarida “Shinjon” agrotexnologiyasi asosida ochiq usulda chigit ekish ishlari olib borilmoqda.

Vazir bu yerda ham ishlarni jadallashtirish, imkoniyatlardan to‘liq foydalanish va agrotexnik tadbirlarni o‘z vaqtida bajarish bo‘yicha tavsiyalar

berdi.

Website Telegram Facebook* YouTube Instagram*