Simpozium doirasida B2B uchrashuvlari o‘tkazildi

Toshkentda o‘tkazilayotgan O‘zbekiston–Niderlandiya qishloq xo‘jaligi hamkorligiga bag‘ishlangan simpozium doirasida qator B2B uchrashuvlari tashkil etildi.

Unda Niderlandiyadan tashrif buyurgan 20 dan ortiq yetakchi kompaniya vakillari ishtirok etib, mahalliy biznes subyektlari hamda ilmiy-tadqiqot institutlari bilan to‘g‘ridan-to‘g‘ri muzokaralar olib bordi.

Uchrashuvlarda issiqxonachilik va urug‘chilik yo‘nalishlari asosiy mavzu bo‘ldi. Tomonlar energiya tejamkor issiqxonalar, sifatli urug‘lik materiallari, seleksiya hamda sertifikatlash tizimini takomillashtirish yuzasidan takliflar bildirdi.

Shuningdek, mahsulotni yetishtirish, qayta ishlash va eksportga chiqarish zanjirini rivojlantirish masalalari muhokama qilindi.

Muloqotlar davomida tajriba almashish, innovatsion yechimlar, qo‘shma loyihalar hamda investitsiyalarni jalb qilish bo‘yicha kelishuvlarga erishildi.

Mutaxassislar ilm-fan va ishlab chiqarish integratsiyasi, zamonaviy texnologiyalarni joriy etish, hosildorlik va samaradorlikni oshirish muhimligini ta’kidladi.

Qayd etilishicha, B2B uchrashuvlari mahalliy tadbirkorlar uchun xalqaro hamkorlar bilan bevosita aloqalar, yangi bozorlar va innovatsiyalar bilan tanishish imkonini yaratdi.

Website Telegram Facebook* YouTube Instagram*