O‘zbekiston–FAO: Sog‘lom va barqaror ovqatlanish sari muhim qadam

Bugungi kunda mamlakatimizda oziq-ovqat tizimlari, sog‘lom ovqatlanish va barqaror rivojlanish bo‘yicha milliy tavsiyalarni ishlab chiqish jarayoni jadallashmoqda.

Shu munosabat bilan poytaxtimizda “oziq-ovqat tizimlariga asoslangan sog‘lom ovqatlanish bo‘yicha tavsiyalarni ishlab chiqishni jadallashtirish” mavzusida texnik seminar o‘tkazildi. Unda davlat idoralari, ilmiy-tadqiqot muassasalari hamda xalqaro tashkilotlar vakillari ishtirok etdi.

Tadbir O‘zbekiston Respublikasi Qishloq xo‘jaligi vazirligi va BMTning Oziq-ovqat va qishloq xo‘jaligi tashkiloti (FAO) hamkorligida tashkil etildi.

Yangi yondashuv ovqatlanish, sog‘liqni saqlash va atrof-muhit barqarorligini yagona tizim sifatida ko‘rib chiqadi. U oziq-ovqat zanjiri, siyosatlarni muvofiqlashtirish hamda uzoq muddatda oziq-ovqat xavfsizligi va aholi salomatligini mustahkamlashga xizmat qiladi.

⚖️ Seminar davomida sog‘lom ovqatlanish bilan bog‘liq dolzarb muammolar muhokama qilindi. Xususan, mikroelementlar yetishmovchiligi, ortiqcha vazn, semirish, yuqumli bo‘lmagan kasalliklar hamda oziq-ovqat xavfsizligi asosiy masalalar sifatida qayd etildi.

Shuningdek, ekologik, ijtimoiy va iqtisodiy omillar ham e’tibordan chetda qolmadi. Jumladan, yer degradatsiyasi, suv resurslaridan samarali foydalanish, oziq-ovqat chiqindilari, issiqxona gazlari chiqindilari hamda sog‘lom ovqatlanishning iqtisodiy imkoniyati muhokama markazida bo‘ldi.

Bundan tashqari, aholi ovqatlanish odatlari, ayniqsa zaif qatlamlar kesimida, ma’lumotlarni kengaytirish zarurligi ta’kidlandi. Bu esa ishlab chiqilayotgan tavsiyalarning amaliyligi, ishonchliligi va milliy sharoitlarga mosligini ta’minlaydi.

�� Seminar yakunida FAO vakillari O‘zbekiston va mintaqa davlatlari bilan hamkorlikda sog‘lom ovqatlanishni rag‘batlantirish hamda oziq-ovqat tizimlarining barqarorligini oshirishga qaratilgan ishlarni davom ettirishini ma’lum qildi.

Website Telegram Facebook* YouTube Instagram*