«Для Беларусі цяпер важна ўжо думаць пра наступны крок». Апублікаваная Канцэпцыя прыцягнення да адказнасці за рэпрэсіі ў Беларусі

На афіцыйным сайце Святланы Ціханоўскай апублікаваная Канцэпцыя прыцягнення да адказнасці за рэпрэсіі ў Беларусі, падрыхтаваная юрыдычнай камандай Офіса.

Дакумент апісвае, як у будучай дэмакратычнай Беларусі могуць расследавацца грубыя парушэнні правоў чалавека, учыненыя пасля 2020 года. У канцэпцыі разглядаюцца роля пацярпелых, захаванне доказаў, права на праўду і кампенсацыю шкоды, а таксама нацыянальныя і міжнародныя механізмы прыцягнення вінаватых да адказнасці.

Асаблівая ўвага ў Канцэпцыі надаецца перспектыве стварэння гібрыднага трыбунала для Беларусі, які аб’яднаў бы нацыянальнае правасуддзе з міжнародным удзелам і вопытам. Такі механізм мог бы стаць найбольш рэалістычнай мадэллю судовага пераследу асоб, адказных за найбольш цяжкія злачынствы.

Леанід Марозаў, дарадца Святланы Ціханоўскай па прававых пытаннях:

«Міжнародны крымінальны суд і Спецыяльны трыбунал па злачынстве агрэсіі супраць Украіны — вельмі важныя прыклады таго, як міжнародная супольнасць рэагуе на найцяжэйшыя злачынствы. Для Беларусі цяпер важна ўжо думаць пра наступны крок — механізм, які будзе працаваць у беларускіх умовах. Я лічу, што такой мадэллю можа стаць гібрыдны трыбунал, які аб’яднае беларускую юрысдыкцыю і міжнародную экспертызу».

Азнаёміцца з канцэпцыяй можна на трох мовах:
— па-беларуску;
— па-руску;
— па-англійску.