Святлана Ціханоўская наведала Чарнобыльскую АЭС і Прыпяць 

Святлана Ціханоўская знаходзіцца з візітам ва Украіне, дзе сёння, 25 траўня, наведала Чарнобыльскую АЭС і Прыпяць — месцы, якія сталі сімвалам адной з самых страшных тэхнагенных катастроф у гісторыі. Дэлегацыя таксама была каля чацвёртага рэактара Чарнобыльскай АЭС.

Для беларусаў Чарнобыль — гэта асабістая і нацыянальная трагедыя. Менавіта Беларусь прыняла на сябе адзін з самых цяжкіх удараў пасля аварыі. Святлана Ціханоўская падкрэсліла, што сёння памяць пра Чарнобыль мае асаблівае значэнне на фоне расійскай агрэсіі, акупацыі Чарнобыльскай зоны ў першыя дні поўнамаштабнай вайны і ядзернага шантажу, у тым ліку праз размяшчэнне расійскай ядзернай зброі ў Беларусі.

«Пабачыць на ўласныя вочы Чарнобыльскую АЭС і Прыпяць — вельмі цяжкі і эмацыйны досвед. Пустыя вуліцах Прыпяці, пакінутыя дамы, школы, дзіцячыя цацкі — усё гэта ціхі напамін аб тым, як хутка можа абарвацца звычайнае спакойнае жыццё. Як адна катастрофа можа пакінуць рану на дзесяцігоддзі. 

Для беларусаў гэта не чужая трагедыя, а нашая агульная боль. Як і многія беларускія дзеці я таксама — дзіця Чарнобыля. Мы ўдзельнічалі ў чарнобыльскіх аздараўленчых праграмах, дзякуючы якім нас прымалі сем’і ў розных краінах і дапамагалі аднавіць здароўе. Я ніколі не забуду гэтай салідарнасці і дапамогі.

У Прыпяці і Чарнобылі асабліва востра адчуваеш, як важна абараняць мір, свабоду і чалавечае жыццё. І як небяспечна, калі ўлада знаходзіцца ў руках людзей, для якіх няма ні межаў, ні маралі, ні адказнасці.

Сёння, калі Расія вядзе вайну супраць Украіны і выкарыстоўвае ядзерны шантаж як інструмент ціску, памяць пра Чарнобыль зноў нагадвае нам, наколькі небяспечнымі могуць быць хлусня, маўчанне і абыякавасць да лёсу людзей. Беларусы ведаюць цану такой катастрофы, і нашая краіна не павінна быць часткай ядзерных пагроз ці агрэсіі.

Я веру, што Беларусь і Украіна будуць разам будаваць будучыню без вайны, дыктатуры ядзерных пагроз».

Разам са Святланай Ціханоўскай Чарнобыльскую АЭС і Прыпяць наведалі прадстаўнікі Аб’яднанага Пераходнага Кабінета Павел Латушка, Валер Мацкевіч, Вольга Зазулінская, а таксама дарадцы Ціханоўскай Дзяніс Кучынскі, Анатоль Лябедзька, Франак Вячорка.

«Кожны такі ўдар толькі яшчэ раз паказвае сапраўдную сутнасць пуцінскага рэжыму — рэжыму, які не прызнае ні чалавечага жыцця, ні міжнароднага права, ні межаў»

Святлана Ціханоўская на свае вочы пабачыла наступствы ўчорашняй атакі Расіі па раёнах сталіцы раён. Адзін з іх — раён Лук’янаўка, які моцна пацярпеў: узніклі шматлікія пажары, цалкам знішчаны гандлёва-забаўляльны цэнтр "Квадрат". 

Святлана Ціханоўская:

«Расія мэтанакіравана спрабуе зламаць людзей страхам, цемрай, пастаяннымі начнымі абстрэламі. Але кожны такі ўдар толькі яшчэ раз паказвае сапраўдную сутнасць пуцінскага рэжыму — рэжыму, які не прызнае ні чалавечага жыцця, ні міжнароднага права, ні межаў. І рэжым Лукашэнкі нясе за гэта сваю адказнасць, бо дазволіў выкарыстоўваць тэрыторыю Беларусі для агрэсіі, для запуску ракет і размяшчэння расійскай зброі.

Але я хачу, каб украінцы ведалі: беларусы — з вамі. Мы падтрымліваем Украіну не таму, што гэта “палітычна правільна”, а таму што адчуваем гэты боль як свой. Мы бачым вашу мужнасць пасля кожнай атакі. Гэта і ёсць сапраўдная сіла. І я ўпэўненая: ніводная ракета не здолее зламаць народ, які змагаецца за сваю свабоду і сваю годнасць.

Слава Украіне! Жыве Беларусь!»

«Для мяне было вельмі важна пачаць гэты візіт менавіта з ушанавання чалавека, які аддаў жыццё за свабоду Украіны і Беларусі». Святлана Ціханоўская ўсклала кветкі на могілкі Марыі Зайцавай

«Першае, што я зрабіла, калі прыехала ў Кіеў — адразу з цягніка наведала магілу Марыі Зайцавай. Яна сімвалізуе не толькі наш супраціў дыктатуры, але і ўкраінска-беларускую салідарнасць. Для мяне было вельмі важна пачаць гэты візіт менавіта з ушанавання чалавека, які аддаў жыццё за свабоду Украіны і Беларусі.

Марыі было ўсяго 24 гады. Яна была вельмі светлым, смелым і прынцыповым чалавекам. Як і тысячы беларусаў, у 2020 годзе яна выйшла супраць гвалту і несправядлівасці ў Беларусі. А калі Расія пачала поўнамаштабную вайну супраць Украіны, яна не засталася ўбаку. Яна далучылася да беларускіх добраахвотнікаў і стала часткай агульнай барацьбы супраць расійскага імперыялізму і дыктатуры.

Для мяне Марыя — гэта сімвал новага пакалення беларусаў. Людзей, якія разумеюць, што свабода Беларусі і свабода Украіны непадзельныя. Яна загінула як герой, але яе імя будзе жыць. І наш абавязак — зрабіць усё, каб ахвяра Марыі і іншых герояў не была марнай».

Разам з Ціханоўскай таксама ўдзел узялі намеснік кіраўніцы Аб’яднанага Пераходнага Кабінета Павел Латушка, кіраўнік апарата Аб’яднанага Пераходнага Кабінета Валер Мацкевіч.

🔥🤫 Квіток Ціханоўскай у Кіеў

«Дзякуй «Укрзалізніці», што бяспечна і хутка даставілі ў Кіеў»,

— падзякавала Ціханоўская

Святлана Ціханоўская пачала афіцыйны візіт у Кіеў

Сачыце за навінамі!

Святлана Ціханоўская — пра сённяшнюю масіраваную атаку Расіі па Украіне: «Сёння ноччу Расія зноў нанесла ганебны ўдар па Украіне. У Кіеве і вобласці ракеты і дроны трапілі ў жылыя дамы. Загінулі мірныя людзі. Дзясяткі пацярпелых, сярод іх — дзеці. Гэта чарговая злачынная атака супраць мірнага насельніцтва. 

Нельга мірыцца з тым, што ў суседняй краіне зноў і зноў абстрэльваюць гарады, разбураюць дамы, забіваюць людзей у іх уласных кватэрах. Кожны такі ўдар — гэта чарговае пацверджанне: агрэсар не спыніцца сам. Яго можна спыніць толькі адзінствам і рашучасцю міжнароднай супольнасці. Гэта не вайна ў звычайным сэнсе — гэта сістэмны, крымінальны тэрор супраць мірнага насельніцтва. І гэты тэрор падтрымліваецца рэжымам Лукашэнкі, які дае расійскай арміі нашую тэрыторыю і размяшчае на ёй расійскую зброю, у тым ліку ракеты «Арэшнік».

Але беларусы працягваюць цалкам падтрымліваць Украіну. Мы заўсёды будзем на баку людзей, якія абараняюць свае дамы, свае сем’і, сваю свабоду. Мы ведаем, што такое жыць побач з агрэсарам, які не прызнае ні межаў, ні чалавечага жыцця.

Мы захапляемся мужнасцю украінцаў. Тым, як вы трымаецеся пасля кожнага ўдару. Як ратавальнікі і медыкі працуюць пад абстрэламі. Як звычайныя людзі дапамагаюць адно аднаму, нягледзячы ні на што. Гэта — сіла, якую немагчыма зламаць ракетамі.

Мы салідарныя з вамі і верым у вашую перамогу.

Слава Украіне! Жыве Беларусь!»

Як завяршыўся III Кангрэс па палітзняволеных у Беларусі? 

Сёння ў Вільнюсе завяршыўся III Кангрэс па палітзняволеных у Беларусі. Другі дзень мерапрыемства быў прысвечаны пошуку стратэгічных шляхоў — як перайсці ад фіксацыі злачынстваў рэжыму да дзеянняў, якія дапамогуць пераадолець крызіс правоў чалавека ў Беларусі.

Другі дзень Кангрэсу пачаўся з прэзентацыі новага дакладу BELPOL «Аб рэальным маштабе палітычных рэпрэсіяў у Беларусі». Даклад падрыхтаваны пры ўдзеле Прадстаўніцтва Аб’яднанага Пераходнага Кабінета па сацыяльнай палітыцы і ініцыятывы «Вольныя» з выкарыстаннем матэрыялаў праваабарончых арганізацыяў Dissidentby і «Вясна». 

На працягу дня ўдзельнікі і ўдзельніцы абмяркоўвалі стратэгіі праваабарончай працы ва ўмовах татальных рэпрэсіяў, межы паміж бяспекай і эфектыўнасцю дапамогі, магчымасці міжнароднага ціску на рэжым, а таксама ролю беларускай супольнасці за мяжой у падтрымцы палітвязняў і ўсяго беларускага грамадства.

У дыскусіях узялі ўдзел праваабаронцы, былыя палітзняволеныя, палітыкі, прадстаўнікі ініцыятыў салідарнасці і беларускай дыяспары. Асобная ўвага была нададзеная таму, як зрабіць падтрымку людзей у Беларусі больш сістэмнай, доўгатэрміновай і эфектыўнай.

Такім чынам, III Кангрэс па палітзняволеных у Беларусі стаў пляцоўкай для абмеркавання таго, як зрабіць падтрымку палітзняволеных больш сістэмнай, а супольныя намаганні — больш скаардынаванымі.