Святлана Ціханоўская: «Сусветны дзень здароўя — дзень, які нагадвае нам пра самую вялікую каштоўнасць у жыцці кожнага чалавека. Здаровы чалавек можа жыць, працаваць, будаваць планы і клапаціцца пра блізкіх. Калі ж здароўе пад пагрозай — усё астатняе адыходзіць на другі план. 

На жаль, сёння ў Беларусі сістэма аховы здароўя перажывае сур’ёзны крызіс. Замест клопату пра пацыентаў усё часцей на першы план выходзяць кантроль і ціск. Людзі сутыкаюцца з доўгімі чэргамі да ўрачоў і на абследаванні, а доступ да якаснай і своечасовай дапамогі становіцца ўсё больш складаным. У той час, калі сацыяльныя сеткі і асабістыя гісторыі людзей перапоўненыя прыкладамі праблемаў у медыцыне, дзяржаўныя выданні часта публікуюць шаблонныя матэрыялы пра нібыта стабільнасць і поспехі сістэмы, што толькі падкрэслівае разрыў паміж афіцыйнай карцінай і рэальным становішчам. І больш за ўсё сэрца баліць за нашых палітвязняў, якія знаходзяцца ў турмах без належнай медыцынскай дапамогі і штодзень губляюць здароўе. 

Асобнай праблемай застаецца адток медыцынскіх кадраў. Гэта значыць, што нагрузка на тых, хто застаўся, толькі расце, а пацыенты губляюць магчымасць атрымаць неабходную дапамогу своечасова.

Сёння я хачу падзякаваць усім медыкам. У цяжкіх умовах, дзе замест годных заробкаў і чалавечага стаўлення з боку дзяржавы, вы чуеце «сколько надо, столько пусть и работают» — вы працягваеце ратаваць жыцці. І гэта сапраўдны гераізм.

І я хачу сказаць кожнаму: мы заслугоўваем сістэму, у якой чалавек — у цэнтры, дзе няма страху, а дапамога аказваецца своечасова і з павагай. Беларусь павінна быць краінай, дзе здароўе людзей не на словах, а на справах з’яўляецца прыярытэтам.

Беражыце сябе і сваіх блізкіх».