«Рэжымы не маюць межаў і не выконваюць міжнародных правілаў»

Сёння Святлана Ціханоўская знаходзіцца з працоўным візітам у Берліне, дзе прайшла міжнародная дыскусія «Абарона тых, хто стаіць на перадавой дэмакратыі: супрацьдзеянне, стрымліванне і аднаўленне пасля транснацыянальных рэпрэсіяў аўтарытарных рэжымаў». У мерапрыемстве прынялі ўдзел дыпламаты, прадстаўнікі сусветных СМІ і аналітычных цэнтраў. 

Асноўныя мэты сустрэчы:
– выпрацаваць канкрэтныя палітычныя рэкамендацыі;
– умацаваць супрацоўніцтва паміж палітыкамі, грамадзянскай супольнасцю і медыя;
– сфарміраваць агульны падыход да супрацьдзеяння транснацыянальным рэпрэсіям.

У сваёй прамове беларуская лідарка адзначыла, што транснацыянальныя рэпрэсіі становяцца сур’ёзнай пагрозай міжнароднай бяспецы:

«У мінулым рэпрэсіі ў асноўным былі абмежаваныя межамі краіны. Але сёння нават за мяжой ты ўжо не можаш адчуваць сябе ў бяспецы. Дыктатуры навучыліся пераследаваць сваіх апанентаў усюды, дзе б яны ні знаходзіліся. Тэма транснацыянальных рэпрэсіяў, над якой вы цяпер працуеце, павінна стаць у цэнтры ўвагі міжнароднай супольнасці. Мы мусім вынесці яе на Раду Бяспекі ААН, а таксама і на Генеральную Асамблею ААН»

Таксама Святлана Ціханоўская заклікала міжнародных партнёраў да рашучых дзеянняў па падтрымцы беларусаў: 

«Я заклікаю нашых міжнародных партнёраў: працягвайце падтрымліваць нашых бежанцаў, нашую грамадзянскую супольнасць, праваабарончыя арганізацыі, палітычных вязняў і незалежныя медыя. Робячы нашую супольнасць моцнай, мы супрацьстаім гібрыднай вайне Лукашэнкі і Пуціна супраць Еўропы.

Чым прасцей легалізацыя, чым лепшая інтэграцыя — тым менш уразлівыя беларусы да транснацыянальных рэпрэсіяў.

Абараняючы беларусаў за мяжой — журналістаў, актывістаў, просьбітаў прытулку і тых, хто ўжо атрымаў прытулак, — еўрапейскія краіны абараняюць саміх сябе ад інфільтрацыі і ўплыву агентаў Лукашэнкі».

Фота: lookby.media