Святлана Ціханоўская прыняла ўдзел у трэнінгу па тактычнай медыцыне

Сёння ў Варшаве Святлана Ціханоўская далучылася да трэнінгу па тактычнай медыцыне, які арганізаваў Рух «Каліноўцы». Разам з беларускай лідаркай навучанне прайшлі дарадца па моладзевай палітыцы Маргарыта Ворыхава, прадстаўніца Аб’яднанага Пераходнага Кабінета па сацыяльнай палітыцы Вольга Зазулінская і былая палітзняволеная Антаніна Канавалава.

Трэнінг праходзіў паводле пратакола TCCC — стандарта тактычнай дапамогі параненым і ўключаў базавы алгарытм MARCH, які дапамагае дзейнічаць у правільнай паслядоўнасці ў першыя хвіліны. Удзельніцы адпрацоўвалі спыненне масіўных крывацёкаў, накладанне турнікетаў і дапамогу параненым у практыцы — у парах і на сабе.

Святлана Ціханоўская:

«Навыкі тактычнай медыцыны ратуюць жыццё — і гэта тое, што асабліва адчуваеш падчас такіх трэніровак. Вялікі дзякуй Руху «Каліноўцы» і трэнерам за гэты досвед, за веды і за магчымасць прайсці гэтае навучанне.

Мы павінны быць гатовыя дапамагчы адно аднаму ў самых складаных умовах. Бо гэта не толькі пра навыкі, але і пра адказнасць і разуменне, што кожны з нас можа выратаваць жыццё».

Рух «Каліноўцы» праводзіць такія трэнінгі для ўсіх ахвотных — каб як мага больш людзей мелі базавыя навыкі дапамогі і маглі ратаваць жыцці. Падрабязнасці — па спасылцы.