Другія кансультацыі паміж урадам Вялікабрытаніі і беларускімі дэмакратычнымі сіламі

9 сакавіка 2026 года прадстаўнікі ўрада Вялікабрытаніі і беларускіх дэмакратычных сілаў правялі кансультацыі ў Форын Офісе (FCDO) у Лондане. Сустрэча аб’яднала афіцыйных асобаў FCDO і прадстаўнікоў беларускіх дэмакратычных інстытутаў, грамадзянскай супольнасці і экспертных колаў для абмену меркаваннямі, умацавання супрацоўніцтва і вызначэння практычных крокаў па падтрымцы дэмакратычных пераменаў у Беларусі.

Брытанскую дэлегацыю ўзначаліў дырэктар Дэпартамента Усходняй Еўропы і Цэнтральнай Азіі FCDO Крыс Аллан, а беларускую — галоўны дарадца Святланы Ціханоўскай Франак Вячорка. Падчас кансультацый удзельнікі абмеркавалі:
1.  Падзеі ўнутры Беларусі і праблемы, з якімі сутыкаецца беларускае грамадства ва ўмовах працяглых рэпрэсіяў: сітуацыі палітвязняў, працяглага палітычнага пераследу і неабходнасці захавання міжнароднага ціску на рэжым. 
2. Пытанні бяспекі, уключаючы рэгіянальную бяспекавую сітуацыю, ролю Беларусі ў вайне Расіі супраць Украіны і больш шырокія рызыкі, звязаныя з мілітарызацыяй краіны. 
3. Правы чалавека і сацыяльную палітыку: сацыяльныя наступствы рэпрэсіяў і прымусовай эміграцыі для беларускіх сем’яў, псіхалагічныя і эканамічныя праблемы, з якімі сутыкаюцца беларусы за мяжой.
4. Ролю культуры, дыяспары і незалежных СМІ ў падтрымцы беларускай дэмакратычнай ідэнтычнасці і ўстойлівасці. 

Падрабязней чытайце па спасылцы.

Гэта ўжо другія кансультацыі паміж FCDO і беларускімі дэмакратычнымі сіламі. Папярэднія кансультацыі адбыліся 21 сакавіка 2025 года ў Лондане.