У Бруселі завяршылася пасяджэнне Кансультатыўнай групы паміж Еўрапейскім Саюзам і беларускімі дэмакратычнымі сіламі 

Сёння, 6 сакавіка, у Бруселі адбылося пасяджэнне Кансультатыўнай групы паміж Еўрапейскім Саюзам і беларускімі дэмакратычнымі сіламі. Святлана Ціханоўская выступіла з заключным словам, падвёўшы вынікі дыскусіі і абазначыўшы галоўныя прыярытэты на найбліжэйшы час.

Ціханоўская падкрэсліла, што пры ўзмацненні расійскага ўплыву важна не толькі працягваць ціск на рэжым, але і падтрымліваць беларусаў, каб праеўрапейскія настроі мацнелі праз кантакты паміж людзьмі, праграмы мабільнасці і візавыя магчымасці. 

Асобна яна адзначыла, што самым балючым пытаннем застаюцца палітвязні, і што патрэбны ціск не толькі дзеля вызвалення людзей, але і дзеля спынення рэпрэсіяў.

Святлана Ціханоўская:

«Я вельмі задаволеная нашымі сённяшнімі дыскусіямі. Яны важныя і паказваюць, што Беларусь мае ключавое значэнне. Нашая сумесная праца працягваецца, і мы разам рухаемся наперад.

Сутыкаючыся з ростам расійскага ўплыву, мы павінны ўмацоўваць праеўрапейскія настроі. Гаворка ідзе не толькі пра СМІ, але і пра праграмы мабільнасці, візы і кантакты паміж людзьмі. Беларусы павінны адчуваць, што для іх ёсць месца ў Еўропе — як асобам і як народу.

І, вядома, самым балючым пытаннем застаюцца палітвязні. Мы павінны дамагчыся, каб усіх іх вызвалілі. Мы павінны працягваць аказваць ціск не толькі для вызвалення людзей, але і для спынення рэпрэсіяў.

Давайце працягваць працаваць над дасягненнем гэтай мэты».