Святлана Ціханоўская сустрэлася з беларускімі добраахвотнікамі і валанцёрамі

Сёння ў Варшаве Святлана Ціханоўская разам з прадстаўніком па абароне і нацыянальнай бяспецы Аб'яднанага Пераходнага Кабінета Вадзімам Кабанчуком правяла сустрэчу з беларускімі добраахвотнікамі і валанцёрамі, якія ваявалі на баку Украіны. 

Падчас сустрэчы Святлана Ціханоўская падзякавала беларускім добраахвотнікам за іх мужнасць і прынцыповую пазіцыю ў барацьбе супраць расійскай агрэсіі: 

«Беларускія добраахвотнікі зрабілі і працягваюць рабіць велізарны ўнёсак у барацьбу супраць расійскай агрэсіі. Дзякуючы вам свет бачыць: беларусы — не саўдзельнікі гэтай вайны, а народ, які змагаецца за бяспеку ўсяго рэгіёну».

Удзельнікі абмеркавалі стратэгічнае супрацоўніцтва з Украінай і візіт беларускай лідаркі ва Украіну, які адбудзецца ў бліжэйшыя месяцы. 

Асобная ўвага была нададзеная пытанням легалізацыі беларускіх добраахвотнікаў ва Украіне.

Таксама абмеркавалі ўмовы для беларускіх ветэранаў: 
– неабходнасць перагляду нормаў, якія фактычна прыраўноўваюць беларускіх добраахвотнікаў да грамадзянаў краіны-агрэсара; 
– забеспячэнне выплат сем’ям загінулых; 
– павелічэнне тэрмінаў легальнага знаходжання пасля завяршэння кантракта;
– спрашчэнне легалізацыі ва Украіне;
– стварэнне механізмаў рэсацыялізацыі пасля службы.