Анатоль Лябедзька — пра сустрэчы ў парламенце Нарвегіі

Сёння Святлана Ціханоўская распачала працоўны візіт у Осла. Падчас візіту дэлегацыя наведала Стортынг — парламент краіны.

Як адзначыў дарадца Святланы Ціханоўскай па парламенцкім супрацоўніцтве Анатоль Лябедзька, падчас размоваў з прадстаўнікамі парламента абмеркавалі тры ключавыя тэмы:
— незалежнасць і бяспеку Беларусі,
— дэмакратыю і правы чалавека,
— таксама магчымасці для беларусаў у Нарвегіі.

Адным з важных пунктаў стала магчымасць стварэння ў Стортынгу групы «За дэмакратычную Беларусь».

Анатоль Лябедзька:

«Для таго, каб быць паспяховымі ў той ці іншай краіне, патрэбныя людзі і структуры, якія будуць прафесійна трымаць беларускае пытанне ў нарвежскім парадку дня. І таму выключна важным бачу стварэнне групы «За дэмакратычную Беларусь» у парламенце Нарвегіі — большую частку дыстанцыі мы ўжо прайшлі. Мы атрымалі падтрымку ад спікера і дэпутатаў, якія займаюцца міжнароднай дзейнасцю. Маем прадстаўнікоў ад трох фракцыяў, якія пагадзіліся стварыць такую групу і працаваць дзеля Беларусі і для Беларусі».