Другая акадэмія жаночага палітычнага лідарства прайшла ў Празе

Другая Акадэмія жаночага палітычнага лідарства прайшла ў Празе і аб’яднала 10 удзельніц, усе з іх — былыя палітзняволеныя. Гэтая ініцыятыва дае магчымасць жанчынам з досведам рэпрэсіяў развіць свой патэнцыял і ўмацаваць лідарскія навыкі.

Акадэмія накіраваная на падрыхтоўку жанчын да больш актыўнага ўдзелу ў палітычных працэсах і прадстаўлення беларускай дэмакратычнай супольнасці на нацыянальным і міжнародным узроўнях.

Праграма ўключала тэарэтычныя заняткі, практычныя модулі, сустрэчы з эксперткамі, а таксама візіты ў амбасады Германіі і Нарвегіі.

Святлана Ціханоўская:

«Акадэмія жаночага палітычнага лідарства — магчымасць для жанчын, якія прайшлі праз рэпрэсіі, аднавіць свае сілы, набыць новыя веды і ўпэўненасць, каб працягваць змагацца за свабодную і дэмакратычную Беларусь.

Дарагія ўдзельніцы, нам вельмі спатрэбяцца вашыя веды, здольнасці, і галоўнае, — вашае жаданне актыўна працаваць дзеля пераменаў. Я ўпэўненая, што кожная з вас знойдзе сваё месца ў арганізацыях грамадзянскай супольнасці і ў структурах нашага дэмакратычнага руху. У прадстаўніцтвах дэмакратычных сілаў, у асобных камандах і праектах у сферах камунікацыі, аналітыкі, адукацыйнай дзейнасці. Галоўнае — каб вы верылі ў сябе і ў тое, што ўсе нашыя з вамі высілкі патрэбныя беларусам і беларускам — верылі ў нашую перамогу».

Акадэмія рэалізуецца дзякуючы супольнай працы Офіса дэмакратычных сілаў Беларусі ў Чэшскай Рэспубліцы, Офіса Святланы Ціханоўскай і чэшскага прадстаўніцтва фонду Rosa Luxemburg Stiftung.