Биржада пропан нархига сиз билан мен тушунмайдиган нимадир қилингани-ю, энди унинг нархи арзонлашиши ҳақида реклама постлари каналларда потирлатиб босилмоқда. Шуниси аниқки, июн ойида янги мошина олиб, 6 млн сўм сарфлаб, пропан ускуна ўрнатганимда АГҚШларда пропаннинг 1 литри нархи 3600–3800 сўм эди. Мазза қилиб, арзон ёқилғида юришни ният қилувдим. Чучварани хом санабман. Ҳозирги кунларда Самарқанд шаҳри ичкарисида пропаннинг бир литри нархи 7200 сўм. Ёлғон бўлмасин, шаҳардан четда Қарши йўлидаги АГҚШлардан биридан сўнгги бор (аввалги кун) 6700 сўмдан олдим. Ўзбекистонда пропандан бўлак ҳеч нарсанинг нархи 5 ойда 2 баробар ошгани йўқ. Англашиляптики, кўрилган зудтар чоралардан сўнг пропаннинг бир литр учун ўртача нарх 5520 сўм бўларкан. Ҳали буни АГҚШга келтириш харажатлари, устига қўйиладиган пул, солиқлар, бало-баттарлар бор. Яна нарх ўша 7000 сўм атрофида бўлади. Бу кўрилган чоралар ҳам пропан нархининг тушишига эмас, унинг янада тақчил бўлиши олиб келса керак. Чунки айни кунларда Самарқандда ҳамма АГҚШларда ҳам пропан йўқ. Одамлар изиллаб ахтариб юрибди, ўша нархи икки баробарга ошган пропанни ҳам. Биржага ёзда кунига 2000 тонна пропан савдога чиқариларди. Ҳозир минг тоннага ҳам етмаяпти. Бу чора ҳокимларнинг қассобларга «гўштнинг килосини 70 мингдан қимматга сотмайсан», деган талабига ўхшаяпти кўпроқ. ➡️ @shokirjonov