​Ўзбекнефтегаз газ қазиб олиш ҳажмини 2024 йилда яна пасайтирадими?

2024 йил Давлат дастурига кўра, Ўзбекнефтгаз АЖ томонидан 2024 йилда қуйидаги геологик-техник тадбирларни амалга ошириш:

95 та ишлатиш қудуғини бурғилаш;

81 та қудуқда мураккаб турдаги капитал таъмирлаш ишларини олиб бориш ҳисобига уларни ишлаб чиқаришга қайтариш;

42 та технологик тадбирни амалга ошириш белгиланган.

Бажарилган ишлар эвазига 29,3 млрд метр куб табиий газни қазиб чиқариш вазифаси қўйилган.

Газ монополисти 2022 йилда 32,2 млрд.куб газ қазиб олган. 2023 йилда қанча газ қазиб олингани ҳали очиқлангани йўқ, лекин Ўзбекнефтегаз расмийси 2023 йил учун табиий газ қазиб олиш прогнозини 34,1 миллиард куб метрдан аввал 32,8 млрд.кубга, кейин эса 32,3 миллиард куб метрга пасайтирганини маълум қилганди.

2 йил аввалги прогнозларда компания геология-қидирув ишлари ҳисобидан газ қазиб олиш ҳажмини 2023-2026 йилларда 34,1 млрд.куб даражасида барқарорлаштириши кўзда тутилганди.

Қудуқларни янада чуқурроқ бурғулаш, уларни капитал таъмирлаш ва бошқа технологик тадбирлар учун сарфланаётган маблағлар ҳажми, бу бўйича ишлаётган пудратчилар, бажарилган ишларнинг натижаси тўғрисида очиқ маълумотлар мавжуд эмас. Лекин бу йўналишда қанча кўп маблағ сарфлангани сайин қазиб олиш шунча пасайиб бораётганини чала очиқ маълумотлар ҳам кўрсатиб турипти.

Республика иқтисодиёти тармоқлари ва аҳолисини табиий газ билан барқарор таъминлаш вазифаси учун масъул сифатида Ўзбекнефтегаздан ташқари янги даврда монополистнинг кон ва ишлаб чиқариш активлари бирин-кетин ўтказилаётган «Саноат Энергетика гуруҳи» МЧЖ ҳам кўрсатилган.