Декрет пулини тўлашда адолат тикланадими? Номзодлар ҳозирча жим

Кампания фаоллашган сари номзодлардан турли сайловчилар гуруҳларига мўлжалланган таклиф ва ваъдалари кўпайиб бормоқда. Айрим таклифларнинг қиймати бир неча юз миллиардни ташкил этади.

Лекин мана кампаниянинг биринчи ҳафтаси ўтмоқдаки биронта номзод ҳомиладорлик ва туғиш нафақаларини тўлаш билан боғлиқ тўловларда адолатни тиклаш ҳақида сўз очгани йўқ.

Ўзбекистонда ҳомиладорлик ва туғиш нафақаларини тўлаш билан боғлиқ тўловлар фақат бюджет ташкилотларда ишлайдиган аёлларга бюджет ҳисобидан тўланади.

Қолганларга бюджетдан пул йўқ. Аниқроғи уларга декрет пули тўлаш (амалда тўламаслик) иш берувчиларнинг ўзларига юклаб қўйилган. Бу қандай оқибатларга олиб келаётганини нодавлат ташкилотларига ишга кираётган аёл қизлар жуда яхши билади. Иш берувчилар туғиш ёшидаги аёл-қизларни ишга қабул қилгандан эркакларни қабул қилишни маъқул кўришади.

Аёлларга имтиёзли кредит, турли дафтарларга тиркаш орқали бериладиган ёрдамлар керак эмас, уларга ўзларининг ҳақи - ишлаган вақтида тўлаган солиқлари ва иш берувчилари тўлаган ягона ижтимоий тўловлари ҳисобига шаклланадиган декрет пуллари қайтарилиши зарур.