Бюджет камситган аёллар ҳақида

2021 йил бюджети лойиҳасини ўрганишда давом этамиз.

Янги йил бюджетида ҳомиладорлик ва туғиш нафақаларини тўлаш билан боғлиқ харажатларга 414,2 млрд.сўм пул ажратилган. Лекин бу пуллар фақат бюджет ташкилотларда ишлайдиган аёлларга мўлжалланган.

Қолган аёлларга-чи дерсиз. Қолганларга бюджетдан пул йўқ. Аниқроғи уларга декрет пули тўлаш (амалда тўламаслик) иш берувчиларнинг ўзларига юклаб қўйилган.

Адолат учун учун айтиш керакки, ҳомиладорлик ва туғиш таътили билан боғлиқ нафақалар иш берувчи зиммасига юкланганига мана бу йил 10 йил бўлди. Қарор қабул қилинганида бу иш туғишни чеклаш инструментларидан бири сифатида қаралган, давлат ҳаражатларини қисқартириш воситаси тарзида эмас.

Янги замонда ўтган даврнинг кўп оғриқли муаммоларига барҳам берилди, лекин аёлларга декрет пулини бюджет ҳисобидан қоплаш борасида қурумсоқлик ва қори-ишкамбалик давом этмоқда.

Вазирлик ва идораларни болалатиб ташлаган, саноқсиз вазирларига Mercedes, тийиқсиз ҳокимларига Tahoe миндириб қўйган серхаражат давлат аёлларнинг келажак авлодни яратиш билан боғлиқ меҳнатга лаёқатсизлиги пайтида қўллашга ожиздек гўё.

Ҳар бир масъул давлат бўлажак фуқароларини дунёга келтираётган ўз аёлларининг хақли нафақасини ўз зиммасига тўлиқ олиши керак.

Аёлларга имтиёзли кредит ё садақа каби кўз кўрсин ёрдамлар керак эмас, уларга ўзларининг ҳақи - ишлаган вақтида тўлаган солиқлари ва иш берувчилари тўлаган ягона ижтимоий тўловлари ҳисобига шаклланадиган декрет пуллари қайтарилиши зарур.

Гендер тенглик бу сенатга аёл кишини ўтказиб қўйиш ёки бир неча сўконғич аёлни ҳокимликка тайинлаш эмас, гендер тенглик аёлларга тегишли бўлган ҳақларни аёллардан юлиб олмасликдир.

P.S. Шу постни ёзаётганимда мана бу хабарга кўзим тушди:
Наманганда ҳоким маслаҳатчилари ва ахборот хизматлари раҳбарларига хизмат автомобиллари топширилди.
Автомашиналар ҳокимга эмас, қанақадир итуруғдек кўпайган маслаҳатчи ва ахборот хизматидагиларга мўлжалланган. Ҳар бир автонинг пулига камида 30-40та аёлнинг декрет пулини бериш мумкин.

@the_bakiroo