Ўзбекистон олчаси: Ҳовлидаги дарахтдан $5 лик экспортгача

Лондондаги йирик кўргазмада Савдо-саноат палатаси раиси ва ўзбекистонлик тадбиркор ўртасида қизиқ бир суҳбат бўлиб ўтган. Суҳбат мазмунини қисқа айтганда, ҳовлидаги оддий олча ва анжир ҳозир экспорт учун энг харидоргир маҳсулотга айланган ва бундан фойдаланиш керак.

Ўтган йили тадбиркорлар аҳолидан олчанинг килосини 15 минг сўмдан сотиб олишган. Кейин уни қайта ишлаб, қишда чет элга 5 доллардан экспорт қилишган. Яъни фойда 5 баравар! Бизнинг олчанинг мағзи тўқ, "гўштли" ва ширинлиги учун чет эллик қандолатчилар уни Польшаникидан кўра кўпроқ қадрлашади. Масалан, Европа олчасидан 3 кило ишлатиладиган жойда, бизникидан 1,5 килоси кифоя қиларкан.

Ҳозир Польша йилига 270 минг тонна олча сотаркан, бизники эса атиги 35 минг тонна. Аслида бу маррани бемалол 200 минг тоннага чиқарса бўлади. Тадбиркорлар экспортбоп навларни экишни тавсия қилишяпти. Бу дарахтлар помидорга ўхшаб ҳар куни сув ва алоҳида парвариш талаб қилмайди, 3 йилда ҳосилга киради.

Нафақат олча, балки анжирнинг ҳам бозори чаққон. Европада килоси 5 долларгача сотиляпти. Энг муҳими, сотиш муаммо эмас, тадбиркорлар қанча маҳсулот бўлса, ҳаммасини сотиб олишга тайёр.
Хуллас, томорқада ва ҳовлида шунчаки мева эмас, жаҳон бозорида талаб юқори бўлган маҳсулот етиштириб, яхшигина даромад қилиш имкони бор.