Тинимсиз ошаётган давлат қарзи ҳеч қурса мактаблар етишмовчилигини йўқ қилишга ишлатилганидами?

"Автомобиль ва темир йўллари, электр энергияси, сув, мактаб ва шифохона бўлмаган жойга инвесторлар келмайди".

Инвестициялар, саноат ва савдо вазири Лазиз Қудратовнинг давлат қарзи ошаётгани бўйича саволларга жавобларига эътироз йўқ. Ростанам йўллар, мактаблар ва шифохоналар инфратузилмасини фақат бюджет имкониятларига таяниб яхшилаб, кенгайтириб бўлмайди.

Лекин давлат қарзи 5 карра ўсган янги даврда нечта янги магистрал йўл барпо этилди? Неча километр иккинчи қатор темир йўллари тортилди?

Ҳа, майли, мактабларда ўқувчи ўрни етишмаслиги муаммосини бартараф эта олдикми? Ҳар йили 6-7 млрд.долларга ўсаётган давлат қарзининг қанча қисмини "Ҳар йили 500 минг, 2030 йилгача 2,5 млн.ўқувчи ўрни яратиш" ғоясини амалга оширишга ишлатдик? Поликлиникалардаги юклама ўтган 10 йилда қанчага ошди?

Жавоблар борми бу саволларга?

Лекин давлат қарзи ошгани сайин хориждаги воситачиларга ҳайдаладиган субсидиялар каррасига ошди, қарз ҳисобига ясалган нархи каррасига шишган лойиҳалар қўзиқориндек кўпайди. Бюджет харажатларининг бебилиска ошишидан тийилиш йўққа чиқди. Давлат қарзи ошгани сайин тарифлар ҳам ошди ва ошмоқда. Ахир қарзни кимдир тўлаши керакку, гарчи қарз "текин пул" деб атаган бўлса ҳам.

Шундай экан, ўзбекистонликларнинг давлат қарзи, самарасиз давлат банки ва зараркунанда давлат компанияларининг ташқи қарзи ошгани сайин хавотири ортиб бораверади, саволи кўпаяверади, чунки урғу - потираб ошаётган қарзларнинг самарадорлигига қўйилмоқда, ҳисобдорлик ишламаётганига эътирозлар кўтарилмоқда.