IPOTEKA-BANK'даги давлат улуши яна бир марта "ювилади"

IPOTEKA-BANK 391,3 млрд.сўмлик қўшимча акциялар чиқаради ва акцияларни ёпиқ тарзда ҳар бир акцияни 1,1 сўмлик қийматда, жами 430,4 млрд.сўмга кредитори - Халқаро молия корпорацияси (ХМК) фойдасига жойлаштиради. Бошқача айтганда, банкнинг ХМК олдидаги қарз мажбуриятлари акцияларга конвертация қилинади. КорпИнфо портали мазкур битимнинг қонунчиликка қанчалик мувофиқлиги масаласини кўтармоқда.

Албатта, қонунчилик талаблари мазкур ва бошқа қарзларни акцияларга "конвертациялаш" битимларида инобатга олиниши муҳим, ўзи аллақачон бу тўғридаги ўзгартиришларни қонунга киритиш пайти ҳам келган.

Масаланинг яна бир тарафи бор. Қўшимча акцияларнинг ХМКга жойлаштирилуви билан Иқтисодиёт ва молия вазирлигининг IPOTEKA-BANK'даги улуши иккинчи марта ювилади ва ҳозирги 19,16%дан 17,38%гача тушади. 2023 йил ноябргача IPOTEKA-BANK'даги давлатнинг (бошқа миноритарлар билан бирга) блокловчи улуши, қўшимча акциялар чиқарилувига розилиги берилгани туфайли 24,8%дан 19,6%гача тушиб кетганди. Блокловчи пакет кейинчалик давлат улушини қимматроқ нархда сотиш (хусусийлаштириш режасида айнан шундай бўлган) ёки давлат манфаатларини барқарор ҳимоялаш учун керак.

ХМКнинг IPOTEKA-BANK капиталига киришини эса, албатта олқишлаш керак. Эҳтимолки, давлатнинг IPOTEKA-BANK'даги қолган улуши айнан ХМКга сотилар?