Ошди-ошди мавсуми бошланди: Электрга боғланган чиқинди тарифлари яна кескин ошмоқда

1 апрелдан бошлаб Тошкент вилоятида чиқинди ташиш тарифлари 38,6%га оширилади. 2025 йилда ҳам чиқинди ташиш тарифларининг кескин оширилиши айнан Тошкент вилоятидан бошланган ва кейин бутун Ўзбекистон ҳудудларини қамраганди. Ёмон анъанага кўра, чиқинди ташишдан кейин электр ва газ, кейин сув, иссиқ сув ва иситиш монополистлари бир-бирини етаклаб тарифларни инфляциядан юқори даражада оширишни бошлашади.

Чиқинди ташиш тарифларига қайтсак. Ҳудудларни бўлиб олган чўнтак компанияларининг хизматлари истеъмолчиларнинг энг кўп шикоят ва норозилиги сабаб бўлаётгани (уларнинг аксари устун музокара кучига эга), кўрсатилмаган хизматлар учун миллиардлаб маблағларнинг ундирилиши нормага айланиб бўлган.

2025 йилда чиқинди учун тўловлар электрга боғлангач, аҳвол янада оғирлашган. Чунки энди чиқинди монополистлари истеъмолчини бемалол светини узиш хавфи орқали жазолаши мумкин, истеъмолчи эса кўрсатилмаган ёки лозим даражада кўрсатилмаган хизмати учун монополистга ҳеч қандай таъсир қила олмайди. Рақобат қўмитасига шикоят қилинган тақдирда ҳам бу ойлаб, йиллаб вақт олади.

Шундай экан, бундан буёғига чиқинди тарифларининг инфляциядан каррасига юқори қимматлашиши, хизмат сифати эса янада қуйига инишига кўниб бориш керак ёки бўлмасам, чиқинди тўловини электрга боғлашдек антиижтимоий ва ҳеч бир нормал давлат амалиётида йўқ ёмон тажрибадан воз кечиш керак.