​235 минг сўмга авиачипта йўқ: Статқўм ҳавошканинг баёнотидан кейин яна "авиачипта арзонлашди" деб ҳисоблайдими?

Монополист ҳавошка пиар баёнотига кўра, 2026 йил 1 апрелдан бошлаб Тошкентдан Андижонга 235 230 сўмга учиш мумкин.

Лекин нафақат апрель ойига, аавичипта сотиб олиш мумкин бўлган август охиригача ҳам 391 132 сўмдан арзонга авиачипта йўқ. Худди шунақа Бухорога ваъда қилинган 276 741 сўмга ҳам чипта йўқ, энг арзони 628 604 сўмдан бошланади.

Албатта, бунақа манипуляциялар бошқа бозор бор ва истеъмолчи ҳақи таъминланган мамлакатларда антимонополия органлари томонидан аёвсиз жазоланган бўларди. Лекин каттаконларнинг севимли ҳавошкасини жазолашга рухсат борми?

Яна бир гап, шу каби хабарлардан кейин статқўмнинг инфляция ҳисобида ҳавошканинг "авиачипта арзонлашгани ҳақидаги" пиар баёнотларини инобатга олиши ёки олмаслиги билан боғлиқ. Масалан, 2025 йил май ойида ҳам худди шунақа тепадаги кўзлар учун ташкиллаштирилган пиар ўйин ортидан, Статқўм ҳаво транспортида йўловчи ташиш хизматлари ўртача 5,4 % га арзонлашганини қайд этган эди. Ваҳоланки, авиачипталар нархи арзонлашмаган, қимматлашишда давом этган.

Статқўм методологияси қандай билмайман, лекин авиачипталар нархининг ўзгариши амалда сотилган чипталар ўртача тортилган нархидан келиб чиқиши керак (эконом энг арзон тоифасидан бизнесгача). Чунки жуда кўп ҳолларда энг арзон тоифадаги чипталар ё саноқли чиқарилади ёки "кўринмайди" (ясама инфляция эса ўша арзон тоифа нархидан белгиланса керак).