Тошкентнинг "яшил" ренессанси қандай бўлади?

Пойтахт ҳокимининг охирги интервюсини пойтахт бошқарувининг сигнали сифатида таҳлил қилиш мумкинми? Узоқ йиллар давомида пойтахт ривожи асосан “квадрат метр” мантиғига қанча кўп қурилиш, шунча яхши деган ёндашувга боғланган эди. Энди эса илк бор экологик баланс, яшил инфратузилма ва шаҳар муҳити сифати каби тушунчалар кун тартибига чиқарилмоқда.

Тилга олинган Бектемирдаги 25 гектарлик “яшил белбоғ”, қарийб 140 гектар янги боғлар ва 12 та сунъий кўл лойиҳалари, албатта, масштаб жиҳатидан эътиборли. Амалга ошса ҳаммамиз учун яхши. Аммо аввалги тажрибаларга қарасак дарахт экиш осон, сақлаш қийин бўлиб келган. Бу сафар фарқли бўладими?

Яна бир муҳим баёнот эса ерга муносабат. Илгари ер, аввало, тижорий ресурс сифатида қабул қилинган бўлса, эндиликда айрим ҳудудларни қурилишдан онгли равишда воз кечилиб, яшил зона сифатида сақлаш  ғояси илгари сурилмоқда. Бу билан маъмурият шаҳарни фақат инвестиция майдони эмас, балки яшаш муҳити сифатида кўра бошланганига пойтахтликларни ишонтираётгандек.