"Инфляция таргет даражасига эришишининг кечикиши хатари пайдо бўлган тақдирда пул-кредит шароитлари янада қатъийлаштирилиши мумкин"

Марказий банк бошқаруви йиғилишида асосий ставка йиллик 14 фоиз даражасида, ўзгаришсиз қолдирилган.

Регулятор баёнотида 2026 йил бошидан иқтисодиётда инфляцион жараёнларнинг муайян тезлашиши кузатилгани, базавий инфляция ўсувчи траекторияга ўта бошлагани, озиқ-овқатлар нархларидаги ўсиш инфляцион кутилмаларнинг юқори сақланиб қолишига хизмат қилаётгани таъкидланган.

Шунингдек, ишлаб чиқарувчилар нархларининг сезиларли ўсиши кузатилаётгани, юқори талаб фонида бу келгуси даврларда ишлаб чиқарувчилар харажатларининг якуний нархларга ўтиб бориши ва уларнинг истеъмол нархларида акс этиши эҳтимоли қайд этилган.

Марказий банк геосиёсий кескинликларнинг кучайиши ҳам нархларга оширувчи хатарларни юзага келтираётганига эътибор қаратган. Хусусан, глобал таъминот занжирларидаги узилишлар натижасида жаҳон бозорида кутилаётган энергия ресурслари ва озиқ-овқат маҳсулотлари нархларининг ўсиши, шунингдек, логистика каналларидаги ўзгаришлар туфайли ташиш харажатларининг ортиши кузатилиши мумкин. Бу эса келгусида импорт нархлари орқали ички инфляцияга қўшимча босимларнинг шаклланишига сабаб бўлиши айтилган.

Регуляторга кўра, инфляция таргет даражасига эришишининг кечикиши хатари пайдо бўлган тақдирда пул-кредит шароитлари янада қатъийлаштирилиши мумкин.