Ҳукмрон партия ва сенаторларимиз ўзбилармон амалдорларга сўров юбориши эмас, парламентга чақириши керак

Ўтаётган ҳафтанинг энг зараркунанда ва ноқонуний ҳодисаси — ташқи реклама воситалари, электромобилларни қувватлантириш станциялари ҳамда енгил конструкцияли объектларни демонтаж қилиниши бўйича Либерал-демократик партияси депутатлари тегишли давлат ташкилотларига депутатлик сўровлари юборишмоқчи экан (қачон юборишади, нимани кутишаяпти, аниқлик киритилмаган). Ўтган куни сенатор Қобил Турсунов Энергетика вазири Жўрабек Мирзамаҳмудов номига сенатор сўрови юборгани маълум бўлганди. Депутат ва сенаторларимиз сўров тайёрлаётган ва юбораётган бир пайтда бузишлар ва узишлар тўхтагани йўқ ва балки сўровларга формал жавоб келгунча, бекат-дўконлар бузиб, лавҳалар синдириб, станциялар узилиб бўлинади.

Бу кутиб турса, сўрилиб кетадиган эмас, янги Ўзбекистонни Каримов Ўзбекистонига қараб етаклаётган фавқулодда ҳодиса.

Билмайман, депутат ва сенаторларимиз бузувчи ва узувчи амалдорлар Конституциянинг кафолат нормаларига дахл қилишаётганини тушунишмоқдами? Агар тушунишганида бу фавқулодда ҳодиса эканини англаб, тийиқсиз амалдорларга сўров жўнатиб, жавоб кутиб ўтирмай, уларни парламент гиламига чақирган, жонли эфирда ҳисобот сўраган ва зўравонликни тўхтатишни талаб қилишган бўлишарди.

Жаноб депутатлар ва сенаторлар яна билишлари керакки, ҳоким-у вазирлар айнан сизларга ҳисобдор, акси эмас (ҳартугул амал қилинмаётган Конституцияда шундай ёзилган).

Овоз берганми ё йўқми, формал бўлсаям, Халқ айнан сизларга мандат берган.