Совға қилинган Газли омбори сотилиши эмас, миллийлаштирилилиши керак

Ўтган ҳафтада ғаройиб сиздирги хабарлар тарқатилди. Ёзилишича, Ўзбекистон ҳукумати иш ҳақи қарздорлиги, бюджет ва банклар олдидаги мажбуриятларни қоплаш учун Enter Engineering, Eriell ва Saneg активларини сотади. Буям ҳаммасимас. Қарзларни ёпиш учун ўзбек халқига тегишли
«Газли» газ омбори оператори — Gazli Gas Storage қўшма корхонасидаги улуш ҳам сотилиши мумкин.

Маълумот учун, 6 млрд.кубгача газ жамлаб қайта тақсимлаш мумкин бўлган Газли омбори бу Ўзбекистон газ конлари, импорти, экспорти, магистрал тармоқлари учун юрак-қон томирдек. Унинг назорати мамлакатимиз энергетик хавфсизлиги калити ҳам.

Қарангки энди шилта схемалар ва шиширилган лойиҳалар пуфаги ёрилгач, Кипрликми, Швейцариялик ё Гонконглик “инвестор”нинг қарзлари халқимизга тегишли Газли омборини сотиб, ёпилармиш. Кечирасизлар. Қарздор “инвестор” қарзини ана Кипр, Швейцария ва Гонконгга ҳайдалган пуллардан ёпиши керак эмасми? Тўғридан-тўғри хориждаги ҳисобларга пул ҳайдашга рухсат берганлар, қайтаришниям уддасидан чиқиши керак.

Ўзи бу “инвесторга” совға қилинган барчп активлар - заводлар, конлар, омборлар, улушлар - ҳаммаси ўзбек халқига қайтарилиши, яъни миллийлаштирилиши лозим. Қизиғи, 7-8 йил ичида эгалланган ёғли активларнинг аксари Ўзбекнефтегаз ёки Ўзтрансгазга тегишли бўлган, яширин қарорлар ва шотир-протоколлар билан эгалланган. Шу билан сунъий чўктирилган ва аёвсиз таланган Ўзбекнефтегаз ва Ўзтрансгаз оёққа турар? Ишончим комил, кредиторлар ҳам, халқаро институтлар ҳам бу ҳаракатларни олқишлашган бўлишарди.

Афсуски, маълум чоралар пишиб, газак олиб кетгачгина кўрила бошланди. 7-8 йил аввал бу бузуқ моделнинг маъно-мазмуни ва охирида қандай тугаши энергетикада ва тақсимотда ҳаммага маълум эди. Лекин бошидаёқ тўхтатиш, тўғри позицияни тепага етказиш ўрнига шерик-мазахўрак бўлишни маъқул кўрилди.

3 йил аввалги энергокулфатдан кейин хулосалар қилиниши, ҳеч қурса Бойсундаги фожеадан кейин кўзлар очилиши керак эди.

Ҳечдан кўра, кеч. Ўтники ўтга, сувники сувга. Халқники халққа!