Ипакчиликда қайта уйғониш

Президентнинг янги қарори билан ипакчилик соҳасида сезиларли ўзгаришлар бўлиши кутилмоқда. Энг асосий янгилик — 2026 йил 1 апрелдан бошлаб пилла етиштирувчилар ва тутзор ташкил қилувчилар учун давлат бюджетидан субсидиялар ажратилишидир.

Бу шуни англатадики, соҳада ишлаётганлар энди давлатдан молиявий ёрдам олишади. Мақсад шунчаки пилла сотиш эмас, балки уни чуқур қайта ишлаб, тайёр маҳсулот сифатида четга қимматроқ сотишдир.

2030 йилгача ипакчиликда маҳсулот ҳажмини кескин ошириш ва экспортни кўпайтириш режалаштирилган. Бу жараёнларни мувофиқлаштириш Енгил саноатни ривожлантириш агентлиги зиммасига юкланди.

Агар ушбу янги тизим ва ажратиладиган маблағлар ҳақиқий меҳнат қилаётган инсонларга шаффоф етиб борса, ҳудудларда минглаб янги иш ўринлари пайдо бўлади. Иқтисодий ислоҳотларнинг самараси эса, одатдагидек, қоғоздаги рақамларда эмас, балки одамларнинг даромади ошганида кўринади.