​Йил охирида аномал камайган NPL йил бошида яна аномал ўсган

Кечикиб тақдим этилган январь ҳисоботига кўра, йилнинг биринчи ойида банкларнинг кредит қўйилмалари 6,4 трлн.сўмга ўсиб, 610,4 трлн.сўмга етган. Ой давомида чакана кредитлар қолдиғи 1,7 трлн.сўмга, корпоратив кредитлар қолдиғи 4,7 трлн.сўмга ўсган.

Регулятор чакана кредитлар таркибини қайта таснифлаган. Эндиликда микрокредитлар, кредит карта ва овердрафтлар микроқарзлар таркибидан ажратилган. Янги таснифда микрокредитлар асосий маҳсулотлардар бирига айланган (аслида аксар тижорат банклари ўзбандлар ва ЯТТларга микрокредит ниқоби остида автокредит ажратаётганини соқит қилмаслик керак).

Ой давомида кредитлашда давлат банклари ўта фаол бўлишган: Миллийбанк (+1,4 трлн.сўм), Агробанк (1,1 трлн.сўм) ва Алоқабанк (+872 млрд.сўм).

Муаммоли кредитлар анъанавий равишда йилнинг биринчи ойида сезиларли ўсган ва 19,4 трлн.сўмга етган (+1,3 трлн.сўм). NPL улуши 3,2%гача кўтарилган (+0,2%). Йилнинг охирги ойида муаммоли кредитларни маъмурий камайтириб кўрсатиш ва йилнинг биринчи ойидаёқ кўрсаткичнинг аномал ўсиши ўзбек банк тизимига хос аномалликка айланиб бўлган.