5,2 млн. бандлик қандай ясалмоқда: 3 млн.бандлик ясалгани кабими?

Газета ўзбандларни рўйхатга олиш орқали сохта ва сунъий бандлик кўрсаткичи ясаш Тошкент кўчаларида ҳам ошкора усулларга ўтгани ҳақида катта материал тайёрлаган (вилоят ва туманларда бу усул аллақачон оммалашган ва ўзбанд қилинмаган одамни топиш қийинлашган).

Ажойиб мисоллар:

"Ўзини „Микрокредитбанк“ агенти дея таништирган шахс мендан Soliq иловасида ўзини ўзи банд қилган шахс сифатида рўйхатдан ўтишимни сўради. Мен доимий ишим борлигини айтсам, регистрациядан ўтиб бўлганимдан кейин мени дарров рўйхатдан ўчириб беришлари мумкинлигини ҳам айтди".

"...фойдаланувчилар Миллий банк, Саноатқурилишбанк, Orient Finance Bank ва бошқаларда ходимлар мижозлардан ўзини ўзи банд қилишни сўраётгани ҳақида ёзган. Бошқа фойдаланувчилар эса банк ходимлари ва солиқчилар олий таълим муассасаларига келиб, талабаларни Soliq мобил дастури орқали ўзини ўзи банд қилдириб кетганини қайд этган".

"Ўтган йили мактабни битираётганимизда ҳар бир болани ўзини ўзи банд қилдиришган....Менинг яқин танишларимни ҳам маҳалла қўмитасидагилар мажбурлаб рўйхатдан ўтказиб кетди".

Бу ҳаммаси эмас. Айрим банкларда агентликка қабул қилинган ходимлар ёппасига шу кўзбўямачиликка сафарбар этилган. Шахсий маълумотлар сақланиши ва дахлсизлиги муаммоси туфайли фуқаролар ўзбанд бўлиб рўйхатга ўтганини ҳам билмасликлари мумкин (тасодиф билан сезиб қолмаса). Яна бир кенг тарқалган усулга кўра, ўзбандлик расмийлаштирилгач, бир муддат ўтиб ноллаштирилади ва яна расмийлаштирилади. Чунки ўзбандлик режаси ҳар ой бажарилиши керак.

Расмий статистикага кўра, ўзбандлар сони 5,5 млн.дан ошиб кетган (бир йилда 2 млн.га кўпайган). Рўйхатдан ўтганларнинг нечтаси “тирик жон”, нечтаси “ўлик жон” эканини ҳеч ким билмайди.

Энг ёмони, мана шундай усуллар билан ясалаётган рақамлар тепага узатилмоқда.