Buklanadigan iPhone Fold dizayni haqida yangi ma’lumotlar

Apple buklanadigan iPhone modelini chiqarishdan oldin, bukilish joyidagi ko‘rinadigan buklamadan xalos bo‘lishi kerakligi allaqachon ma’lum edi.

Endi esa ma’lumotlar shuni ko‘rsatmoqdaki, iPhone Fold Samsung tomonidan ishlab chiqilgan yangi turdagi buklanadigan panelga ega bo‘ladi. Ushbu panel ikki shisha orasiga joylashtiriladi — ultranozik va ultrayengil buklanadigan shishalar.

Shunday qilib, displey ikki shisha orasida joylashadi, bu esa sharnirdan keladigan bosimni kamaytiradi va bukilish joyidagi deformatsiyani oldini oladi.

Shuningdek, ekranni himoya qilish uchun Samsung buklanadigan smartfonlaridagi kabi emas, balki ancha qattiqroq va chidamli plyonka ishlatilishi xabar qilinmoqda.

Apple kompaniyasining birinchi buklanadigan qurilmasi o‘zini tiklay oladigan shisha, birikmasiz sharnir konstruktsiyasi va UTG/UFG shishalaridan ikki qatlamli arxitekturaga ega bo‘ladi. Bu konfiguratsiyada displey sharnir bilan to‘g‘ridan-to‘g‘ri aloqa qilmay, ikki shisha qatlami orasida joylashadi. Bu ishonchlilikni oshiradi va nazariy jihatdan buklamaning paydo bo‘lishini yaxshiroq nazorat qilish imkonini beradi — deya xabar beradi insayder Digital Chat Station.

Smartfonda 7,8 dyuym ichki ekran va 5,5 dyuym tashqi ekran bo‘ladi. Korpus qalinligi ochilgan holatda taxminan 4,5 mm va yopilgan holatda 9–9,5 mm bo‘ladi.

Apple buklanadigan iPhone modelini joriy yilning sentyabr oyida iPhone 18 Pro lineykasi bilan birga taqdim etishi kutilmoqda.