OnePlus aprel oyidayoq global bozordan chiqib ketishi mumkin

OnePlus kompaniyasining Xitoydan tashqaridagi faoliyatini qisqartirishi yoki yopishi mumkinligi haqida yangi ma’lumotlar paydo bo‘ldi.

Bir nechta manbalarga ko‘ra, kompaniya 2026-yil aprel oyidayoq xalqaro biznesining bir qismini to‘xtatib, asosiy e’tiborni Xitoy bozoriga va Hindiston uchun yanada arzon modellarga qaratishi mumkin.

Insayder Yogesh Brar bu haqda avvalroq ijtimoiy tarmoqlarda yozgan, 9to5Google manbalari esa buni tasdiqladi: gap ayrim hududlarda, jumladan Yevropaning katta qismida faoliyatni to‘xtatish haqida ketmoqda.

Aniq muddatlar hali yo‘q, biroq tayyorgarlik ishlari allaqachon boshlangan — xodimlarning bir qismi oldindan ogohlantirilgan, ayrimlariga esa kompensatsiya taklif qilingan.

Aslida qisqarish jarayoni yangi emas. 2020-yilda ham kompaniya Yevropadagi ishtirokini keskin kamaytirib, Buyuk Britaniya va Germaniyadagi ofislarini yopgan edi.

Shu bilan birga, OnePlus tobora OPPO bilan integratsiyalashib bormoqda: kompaniya asoschilaridan biri Pit Lau bosh kompaniyada yuqori lavozimga o‘tgan.

Bunga qaramay, yangi OnePlus qurilmalari hali ham taqdimotga tayyorlanmoqda, ammo ularning ayrimlari Xitoydan tashqariga chiqmasligi mumkin. Masalan, kecha kompaniya yangi OnePlus 15T modelini taqdim etdi.

Avvalroq OnePlus chiqarilgan smartfonlar uchun yangilanishlar va servis qo‘llab-quvvatlovi saqlanib qolishini va’da qilgan.