Lenovo yana o’yin smartfoni bilan qaytmoqda

Internetda 2022-yildan beri ilk bor chiqarilayotgan Lenovo Legion o’yin smartfonining real suratlari paydo bo‘ldi. Tashqi ko‘rinishi jihatidan u Motorola Edge 70 modeliga juda o‘xshaydi — ayniqsa kamera blokining dizayni bilan. Uni ajratib turadigan yagona detal — orqa paneldagi Legion yozuvi.

Xususiyatlar haqida hozircha ma’lumot yo‘q, faqat mish-mishlarga ko‘ra, qurilma yana bir o’yin smartfoni — RedMagic 11 Pro bilan raqobatlashadi. Demak, ichki texnikasi ham shunga mos darajada kuchli bo‘lishi kutilmoqda. Eng mantiqli variant — yaqinda taqdim etilgan Legion Tablet Gen 5’dagi Snapdragon 8 Elite Gen 5 chipidan foydalanish.

Klassik geymer xususiyatlari ham bo‘lishi kutilmoqda: yuqori yangilanish tezligiga ega displey, minimal javob berish vaqti va kuchaytirilgan sovitish tizimi. Ichki “AI-funksiyalar” ham odatdagidek qo‘shilishi ehtimoldan xoli emas.

Juda qulay vaqt tanlangan: ASUS yangi ROG smartfonlarini chiqarishni to‘xtatdi va muxlislar yangiliksiz qolgan edi — Lenovo esa ayni paytda sahnaga chiqmoqda. Suratlar ataylab tarqatilganga o‘xshaydi, demak yaqin orada qurilma haqida ko‘proq texnik tafsilotlar va rasmiy e’lonni kutish mumkin.