موقتەدا سەدر، زنجیرەیەک بڕیاری توند و بێپێشینەی بۆ ڕێکخستنەوەی فەرماندە و چەکدارانی "سەریایاسەلام" (باڵی سەربازیی ڕەوتەکەی) دەرکرد، کە تێیدا جەخت لە پاکتاوکردنی دارایی و دوورکەوتنەوە لە ژیانی سیاسی و میدیایی دەکاتەوە.

بەپێی نووسراوێکی فەرمیی نووسینگەی تایبەتی موقتەدا سەدر، لیژنەیەکی حەوت کەسی پێکهێنراوە کە ئەرکی "وردبینی دارایی" بۆ سەرجەم فەرماندەکانی سەریایاسەلام دەبێت، چ پێش وەرگرتنی پۆستەکانیان و چ لە کاتی کارکردنیاندا. هاوکات بڕیاردراوە دەست بەسەر ئۆتۆمبێلە تایبەتەکانی فەرماندەکاندا بگیرێت و چەکە زیادەکانیشیان لێ وەربگیرێتەوە.

لە بڕیارە نوێیەکاندا، سەدر بە توندی ڕێگری لە فەرماندەکانی کردووە پەیوەندییان لەگەڵ هیچ سیاسەتمەدارێکدا هەبێت. هەروەها فەرمانی پێکردوون کە سەرجەم لاپەڕە تایبەتەکانیان لە تۆڕە کۆمەڵایەتییەکان دابخەن و بە هیچ شێوەیەک لە میدیاکاندا دەرنەکەون.