وەزارەتی نەوتی عێراق: کارەکانی نۆژەنکردنەوە و پشکنینی هێڵی کۆنی بۆری نەوتی کەرکووک-جەیهان لە قۆناغی کۆتاییدایە. بڕیارە لەگەڵ تەواوبوونی پرۆسەکە و لە قۆناغی یەکەمدا، ڕۆژانە 600 هەزار بەرمیل نەوت لەو ڕێگەیەوە هەناردەی بازاڕەکانی جیهان بکرێت.

سەبارەت بە وردەکارییەکان، وتەبێژی وەزارەتی نەوتی عێراق ئاماژەی بەوە کرد، کە هێڵەکە هیچ کێشەیەکی سیاسی یان یاسایی نییە و تەنها هۆکارە تەکنیکییەکان بوونەتە ڕێگر لەبەردەم دەستپێکردنەوەی هەناردە؛ چونکە هێڵەکە بۆ ماوەیەکی درێژ پەککەوتبوو و لە سەردەمی شەڕی دژی داعشیشدا زیانی زۆری بەرکەوتبوو.

وتەبێژی وەزارەت ڕوونیشیکردەوە، لە ئێستادا پشکنینەکان گەیشتوونەتە قۆناغی هایدرۆستاتیکی بۆ دڵنیابوونەوە لە توانای بەرگەگرتنی فشار و سەلامەتی هێڵەکە، تاوەکو دوای دڵنیابوونەوەی تەواو لە لایەنە هونەرییەکان، پرۆسەی هەناردەکردنەکە دەستپێبکاتەوە.