СССРни тиклашни тарғиб қилиб келган фуқаро 4 йилу 2 ойга озодликдан маҳрум қилинди

Жиноят ишлари бўйича Шайхонтоҳур туман судининг ёпиқ мажлисида Азиз Ҳакимовга нисбатан жиноят иши бўйича ҳукм ўқилди. Суд уни бир қатор жиноятларни содир этганликда айбдор деб топиб, 4 йил 2 ойга озодликдан маҳрум қилди.

Суд маълумотига кўра, Ҳакимов Жиноят кодексининг туҳмат, ҳақорат қилиш ҳамда миллий, ирқий, этник ёки диний адоват қўзғатишга оид моддалари бўйича айбдор деб топилган. Шу билан бирга, унга нисбатан қўйилган урушни тарғиб қилиш айблови бўйича жиноят таркиби мавжуд эмаслиги сабабли оқланган.

Суд ҳукми билан Рақамли технологиялар вазирлигига Ҳакимов юритган Telegram’даги «Comrade_Aziz» каналини блоклаш мажбурияти ҳам юклатилди. Иш бўйича олти нафар жабрланувчига етказилган моддий ва маънавий зарарни ундириш учун фуқаролик судига мурожаат қилиш ҳуқуқи тушунтирилди.

Азиз Ҳакимов ижтимоий тармоқларда СССРни қайта тиклаш ғоясини илгари сургани, Ўзбекистон суверенитетига қарши чиқишлари ҳамда тарихий воқеаларга оид кескин баёнотлари билан танилган. У 2025 йилда журналист Шерзодхон Қудратхўжани камситгани учун 18,75 млн сўм жаримага ҳам тортилган эди.

@shokirjonov